کناڈا: ٹورنٹو میں برسرعام فائرنگ، 5 افراد کی موت، مشتبہ شخص بھی پولیس فائرنگ میں ہلاک

کناڈا کے ٹورنٹو شہر میں گولی باری کا ایک واقعہ پیش آیا ہے جس میں پانچ لوگوں کی موت ہو گئی۔ افسران کے مطابق مشتبہ افراد کو بھی پولیس نے گولی مار کر ہلاک کر دیا ہے۔ نیوز ایجنسی شنہوا نے افسران کے حوالے سے بتایا کہ پولیس کو اتوار کو واگھن میں ایک کانڈو یونٹ میں ایک ’بھیانک منظر‘ دکھائی دیا، جہاں پانچ لوگوں کی موت ہو گئی تھی۔

جانکاری کے مطابق شوٹنگ اور تصادم کے بعد بلڈنگ کو خالی کرا دیا گیا ہے۔ ایک پولیس افسر کا کہنا ہے کہ بلڈنگ کے ایک سے زائد یونٹ متاثر ہوئے ہیں۔ وہیں پولیس چیف کا کہنا ہے کہ حالات کنٹرول میں ہیں اور اب علاقے کے لوگوں کو کوئی خطرہ نہیں ہے۔

فائرنگ میں واگھن شہر کے میئر اسٹیون ڈیل ڈیوکا کا بھی بیان آیا ہے۔ انھوں نے کہا کہ ’’میں موقع پر پہنچنے والے ’بہادر‘ پولیس آفیسرز کے کام کی تعریف کرتا ہوں، جو حالات کو محفوظ رکھنے کے لیے کام کر رہے ہیں۔ میں گولی باری میں مارے گئے متاثرین کے گھر والوں کے تئیں اپنی ہمدردی ظاہر کرتا ہوں۔‘‘