وینس میں المناک سڑک حادثہ، بس پل سے گر گئی، 21 افراد جاں بحق، وزیراعظم کا اظہار افسوس

میتھین گیس پر چلنے والی بس منگل (3 اکتوبر) کو اٹلی کے شہر وینس میں ایک پل سے گر گئی۔ پل سے گرنے کے بعد بس میں آگ لگ گئی۔ اس حادثے میں دو بچوں اور غیر ملکیوں سمیت کل 21 افراد کی موت ہو گئی۔ 18 افراد زخمی بھی ہوئے۔ شہر کے میئرلوگی برگنارونے فیس بک پر حادثے کی اطلاع دی۔

جب مسافروں سے بھری بس کیمپنگ گراؤنڈ کی طرف جا رہی تھی اس وقت رات تقریباً 7:30 بجے ایک اوور پاس پر حادثہ پیش آیا۔ بس میں فوراً آگ لگ گئی۔ بس میسترے ضلع میں ریلوے لائنوں کے قریب گر گئی۔ تاہم ابھی تک حادثے کی وجہ واضح نہیں ہوسکی ہے۔ وینس کے سٹی کونسلر ریناٹو بوراسو نے کہا کہ ابتدائی تحقیقات سے معلوم ہوا ہے کہ 40 سالہ بس ڈرائیور حادثے سے قبل بیمار تھا۔

وینس کے علاقے کے گورنر لوکا زائیا نے کہا کہ مرنے والوں کی تعداد 21 ہے اور 20 سے زیادہ لوگ ہسپتال میں داخل ہیں۔ لاشوں کی شناخت کے لیے کوششیں جاری ہیں۔ ہلاک اور زخمی ہونے والوں میں نہ صرف اٹلی بلکہ کئی دوسرے ممالک کے لوگ بھی شامل ہیں۔

ملک کی وزیر اعظم جارجیا میلونی نے حادثے پر گہرے دکھ کا اظہار کیا ہے۔ انہوں نے ایک بیان میں کہا، "میں اس سانحے کی پیروی کرنے کے لیے میئر لوگی برگنارو اور (ٹرانسپورٹ) وزیر میٹیو سالوینی سے رابطے میں ہوں۔"

اٹلی کے وزیر داخلہ میٹیو پیانٹیدوسی نے کہا کہ آگ بجلی کی تاروں سے رابطے میں آنے کے بعد میتھین کی وجہ سے تیزی سے پھیلی۔ انہوں نے کہا کہ انہیں  خدشہ ہے کہ مرنے والوں کی تعداد بڑھ جائے گی۔