بنگال عام انتخابات LIVE: بہرام پور لوک سبھا سیٹ سے کرکٹر یوسف پٹھان جیتے!

مغربی بنگال کے بہرام پور لوک سبھا سیٹ سے ٹی ایم سی کے امیدوار کرکٹر یوسف پٹھان نے جیت حاصل کی ہے۔ ان کے مقابل کانگریس و بی جے پی سمیت کل 16 امیدوار تھے۔ الیکشن کمیشن کی ویب سائٹ کے مطابق یوسف پٹھان کو 496534 ووٹ ملے ہیں۔

گزشتہ لوک سبھا انتخاب میں بی جے پی نے مغربی بنگال کی 42 لوک سبھا سیٹوں میں 18 سیٹیں حاصل کی تھیں، اور اس مرتبہ وزیر داخلہ امت شاہ نے 30 سے زیادہ سیٹیں حاصل کرنے کا دعویٰ کیا تھا، لیکن یہ دعویٰ غلط ثابت ہوتا ہوا دکھائی دے رہا ہے۔ اب تک 42 سیٹوں کے جو رجحانات سامنے آئے ہیں اس کے مطابق بی جے پی کو محض 10 سیٹوں پر سبقت حاصل ہے۔ ترنمول کانگریس کی ہوا چلتی ہوئی دکھائی دے رہی ہے کیونکہ 30 سیٹوں پر اس نے سبقت بنا رکھی ہے۔ بقیہ 2 لوک سبھا سیٹوں پر کانگریس امیدوار آگے ہیں۔

مغربی بنگال میں اچھی شروعات کے بعد بی جے پی کی حالت خستہ دکھائی دے رہی ہے۔ جو رجحانات سامنے آئے ہیں ان میں ترنمول کانگریس 28 سیٹوں پر آگے چل رہی ہے، جبکہ بی جے پی 10 سیٹوں پر سبقت بنائے ہوئی ہے۔ کانگریس امیدوار 3 سیٹوں پر آگے چل رہے ہیں۔ گزشتہ لوک سبھا انتخاب میں بی جے پی نے 42 لوک سبھا سیٹوں میں سے 18 پر قبضہ کیا تھا، جبکہ ترنمول کانگریس نے 22 اور کانگریس نے 2 لوک سبھا سیٹوں پر کامیابی حاصل کی تھی۔

بہرام پور لوک سبھا سیٹ پر کانگریس کے ادھیر رنجن چودھری نے سبقت بنا لی ہے۔ کچھ دیر پہلے تک ترنمول کانگریس کے یوسف پٹھان اس سیٹ سے آگے چل رہے تھے، لیکن اب وہ دوسرے نمبر پر آ گئے ہیں۔ تیسرے نمبر پر بی جے پی امیدوار نرمل کمار ساہا ہیں۔

مغربی بنگال میں بی جے پی اور ترنمول کانگریس کے درمیان سخت ٹکر دیکھنے کو مل رہی ہے۔ ابھی پوسٹل بیلٹ پیپر کی گنتی ہو رہی ہے اور تازہ رجحانوں میں بی جے پی نے 17 اور ترنمول کانگریس نے 18 سیٹوں پر سبقت بنا رکھی ہے۔

مغربی بنگال میں لوک سبھا کی 42 سیٹیں ہیں۔ گزشتہ بار یہاں کی 22 سیٹوں پر ترنمول کانگریس، 18 سیٹوں پر بی جے پی اور 2 سیٹوں پر کانگریس نے کامیابی حاصل کی تھی۔ یہاں مجموعی طور پر ووٹنگ کا فیصد 79.97 رہا جو 4 سب سے زیادہ لوک سبھا سیٹوں والی ریاستوں میں سب سے بہتر ہے۔