چیتن شرما کی گیند پر میاں داد کا چھکّا... وسیم اکرم نے کیا نیا انکشاف

پاکستان کے سابق کپتان اور دنیا کے مایہ ناز تیز گیندباز وسیم اکرم نے چیتن شرما کی گیند پر میاں داد کے ذریعہ مارے گئے چھکّا سے متعلق ایک نیا انکشاف کیا ہے جس کے بارے میں اب تک کسی کو معلوم نہیں تھا۔ یہ انکشاف انھوں نے دوبئی میں’سلام کرکٹ‘ نام سے منعقد ایک کنکلیو میں کیا جو کہ ’آج تک‘ کے ذریعہ کرایا گیا۔اس کنکلیو کے دوران وسیم اکرم نے 1986 میں شارجہ میں کھیلے گئے اس دلچسپ میچ کا تذکرہ کیا جس میں آخری گیند پر چھکّا لگا کر میاں داد نے پاکستان کو فتح سے ہمکنار کرایا تھا۔

وسیم اکرم نے اس لمحہ کو یاد کرتے ہوئے کہا کہ ’’پوری دنیا جانتی ہے کہ شارجہ میں اس دن جاوید میاں داد نے چیتن شرما کی گیند پر چھکّا لگا کر ہندوستان سے جیت چھین لی، لیکن ایک بات شاید کوئی نہیں جانتا۔ اس چھکّا میں میرا بھی بہت اہم تعاون تھا۔‘‘ انھوں نے اس دوران انکشاف کیا کہ ’’جاوید میاں داد نے جس بلّے سے چیتن شرما کی گیند پر چھکّا لگایا تھا وہ میرا تھا۔‘‘ وہ مزید کہتے ہیں کہ ’’جب اس میچ کو جیتنے کے لیے پاکستان کو آخری گیند پر 4 رنوں کی ضرورت تھی تو میاں داد نے چھکّا مارنے کے لیے میرا بیٹ منگوایا تھا اور ایسا کرنے میں وہ کامیاب ہو گئے۔ اپنے بلّے سے متعلق وسیم اکرم کہتے ہیں کہ ’’میرا وہ بلّا بہت خاص تھا اور کافی بڑھا بھی تھا۔ میاں داد نے میرے جس بلّے سے چھکّا مارا تھا اس کی اب تک چار بار نیلامی بھی ہو چکی ہے۔‘‘

جب وسیم اکرم نے میاں داد کے چھکّا اور اپنے بلّے سے متعلق انکشاف کیا تو اس وقت ہندوستان کے مشہور و معروف کرکٹر کھلاڑی سنیل گواسکر بھی کنکلیو میں موجود تھے۔ انھوں نے 1986 کے اس لمحہ کو یاد کرتے ہوئے کہا کہ ’’چیتن آخری گیند یارکر ڈالنا چاہتے تھے لیکن وہ ایسا کر نہیں پائے اور گیند یارکر کی جگہ فُل ٹاس چلا گیا جس کا فائدہ اٹھاتے ہوئے میاں داد نے چھکّا مار دیا۔‘‘

واضح رہے کہ 1986 میں ’آسٹریلیشیا‘ کپ کے فائنل مقابلہ میں ہندوسان اور پاکستان آمنے سامنے تھے۔ پاکستان کو آخری گیند پر چار رنوں کی ضرورت تھی اور میاں داد نے چیتن شرما کی گیند پر 6 رن بنا ڈالے تھے۔ اس کے ساتھ ہی پاکستان کسی بڑے ٹورنامنٹ کے فائنل میں ہندوستان کو پہلی بار شکست دینے میں کامیاب ہوا تھا۔