یورپی یونین کے لیے امریکی سفیر پر جنسی بدتمیزی کے الزامات

جن خواتین نے یہ الزامات عائد کیے ہیں، ان کے مطابق گورڈن سونڈلینڈ نے یہ مبینہ 'بداخلاقیاں‘ سن 2003 اور سن 2010 کے درمیان کی تھیں۔ یہ الزامات ایسے وقت پر سامنے آئے ہیں جب حال ہی سونڈلینڈ نے امریکی ایوانِ نمائندگان میں صدر ڈونلڈ ٹرمپ کے مواخذے کی تفتیش کے دوران ایسی گواہی بھی دی، جسے کلیدی قرار دیا گیا تھا۔

سونڈلینڈ نے ان تینوں خواتین کے اپنے خلاف الزامات کو مسترد کر دیا ہے۔ اپنے وکلاء کے توسط سے انہوں نے کہا کہ یہ الزامات امریکی صدر کے مواخذے کی کارروائی کے دوران ان کی کردارکشی کی کوششوں کا حصہ ہیں۔ امریکی سفیر کے خلاف یہ الزامات امریکی ریاست اوریگن سے چھپنے والے ماہانہ جریدے پورٹ لینڈ اور ایک غیر سرکاری تنظیم پرو پبلیکا کی جانب سے سامنے آئے ہیں۔

جریدے پورٹ لینڈ میں شائع ہونے والے مضمون میں ان خواتین نے وضاحت کی کہ انہوں نے مختلف ملاقاتوں کے دوران سونڈلینڈ کی جانب سے کی جانے والی جنسی پیش قدمی کے واقعات کو فوری طور پر روک دیا تھا۔ ان میں سے ایک خاتون جینا سولس نے بتایا کہ سن 2008 میں وہ گورڈن سونڈلینڈ سے اُس وقت ملی تھیں، جب وہ ایک ہوٹل میں سیفٹی ایکسپرٹ کی ملازمت حاصل کرنے کی کوشش میں تھیں۔

سولس کے مطابق اس ملاقات میں سونڈلینڈ نے انہیں اپنے گھر پر ملاقات کی دعوت دی تھی اور جب وہ ان سے ملنے گئی تھیں، تو سونڈلینڈ نے جنسی پیش قدمی کی، جسے انہوں نے روک دیا تھا۔ جینا سولس کے مطابق کچھ عرصے بعد ایک میٹنگ میں سونڈلینڈ نے زبردستی ان کا بوسہ لینے کی کوشش بھی کی تھی۔

الزام عائد کرنے والی ایک دوسری خاتون کا نام نکول ووگل ہے۔ ووگل کو سن 2003 میں سونڈلینڈ نے ہوٹل کا کمرہ دیکھنے کی پیشکش کی تھی اور جب وہ کمرہ دیکھنے گئیں تو سونڈلینڈ نے مبینہ طور پر زبردستی انہیں چومنا چاہا، لیکن اس خاتون نے انہیں ایسا کرنے سے روک دیا تھا۔

نکول ووگل یہ الزامات شائع کرنے والے جریدے 'پورٹ لینڈ منتھلی‘ کی مالکہ بھی ہیں۔ یہ جریدہ غیر حکومتی تنظیم پرو پبلیکا کے ساتھ مختلف سرگرمیوں میں بھی شریک رہتا ہے۔

سونڈلینڈ کی جانب سے تردیدی بیان میں اس مضمون کی اشاعت کو 'دھوکے پر مبنی صحافت‘ قرار دیا گیا ہے۔ انہوں نے یہ بھی کہا کہ سن 2003 میں نکول ووگل کے جریدے میں سرمایہ کاری سے انکار کے جواب میں اب یہ مضمون شائع کیا گیا ہے۔

گورڈن سونڈلینڈ ایک بڑی کاروباری شخصیت ہیں۔ ان کی کمپنی 'پرووینانس ہوٹل‘ (Provenance Hotel) کئی ہوٹلوں کی مالک ہے۔ انہوں نے یورپی یونین میں امریکی سفیر کا منصب جولائی سن 2018 میں سنبھالا تھا۔