مشکلات میں پھنسی اسپائس جیٹ کو ملی راحت، ایشلان آئرلینڈ میڈیسن وَن کے ساتھ 413 کروڑ روپے کا تنازعہ حل

ہندوستان کی شہری ہوابازی کمپنی اسپائس جیٹ کئی تنازعات میں پھنسی ہوئی ہے اور لگاتار اس سے باہر نکلنے کی کوششوں میں مصروف ہے جس میں کامیابی بھی مل رہی ہے۔ جمعرات کو کمپنی نے اس وقت سکون کی سانس لی جب ایشلان آئرلینڈ میڈیسن وَن لمیٹڈ کے ساتھ جاری ایک تنازعہ بھی حل ہو گیا۔ کمپنی نے اپنے ایک بیان میں کہا ہے کہ اس نے طیارہ کرایہ پر دینے والی کمپنی ایشلان آئرلینڈ میڈیسن وَن لمیٹڈ کے ساتھ 413 کروڑ روپے کا تنازعہ حل کر لیا ہے۔ غور کرنے والی بات یہ ہے کہ یہ گزشتہ دو ہفتے میں اس طرح کا تیسرا تنازعہ ہے جس کا اسپائس جیٹ نے نمٹارا کیا ہے۔

اسپائس جیٹ نے اپنے ایک بیان میں کہا ہے کہ ایشلان کے ساتھ قانونی تنازعہ کا نمٹارا ہونے سے 4.8 کروڑ ڈالر یعنی تقریباً 398 کروڑ روپے کی بچت ہوگی۔ اس تنازعہ کے نمٹنے کے بعد اسپائس جیٹ دو ایئرفریم کا حصول کرے گی۔ عام طور پر ایئرفریم بغیر انجن والا طیارہ ہوتا ہے۔ کئی رخنات کا سامنا کر رہی اور رقم جمع کرنے کے عمل میں مصروف اسپائس جیٹ تین تنازعات کا نمٹارا کر تین ایئر فریم حاصل کر رہی ہے۔ یہ ایئرفریم بوئنگ 737 این جی طیاروں کے ہیں۔

اسپائس جیٹ کا کہنا ہے کہ ان (تین) کامیاب نمٹاروں سے ایئرلائن کو مجموعی طور پر 685 کروڑ روپے کی بچت ہوئی ہے۔ اس سے قبل اسپائس جیٹ نے 5 مارچ کو تقریباً 1.12 کروڑ ڈالر (تقریباً 93 کروڑ روپے) کے تنازعہ کے سلسلے میں کراس اوشن پارٹنرس کے ساتھ معاہدہ کیا تھا۔ اس سے قبل 28 فروری کو اسپائس جیٹ نے سیلسٹیل ایویشن کے ساتھ 2.99 کروڑ ڈالر (تقریباً 250 کروڑ روپے) کا تنازعہ سلجھایا تھا۔