شرمناک! کھٹر حکومت میں ہوم ورک نہ کرنے والی معصوم بچی کا ٹیچر نے کیا منھ کالا

ہریانہ کے ہسار واقع ایک پرائیویٹ اسکول میں شرمسار کرنے والا ایک واقعہ سامنے آیا ہے جس کے بعد لوگوں میں زبردست ناراضگی دیکھنے کو مل رہی ہے۔ دراصل اسکول میں درجہ 4 کی دو بچیوں سمیت 7 بچوں کو ہوم ورک پورا نہیں کرنے کے لیے سزا دی گئی، اور سزا یہ تھی کہ ان کے منھ پر سیاہی مل دی گئی اور پھر سبھی کلاس میں گھمایا گیا۔ یہ واقعہ منظر عام پر آنے کے بعد استحصال کی شکار طالبہ کے اہل خانہ نے اسکول انتظامیہ اور پرنسپل کے خلاف کیس درج کر انھیں گرفتار کرنے کا مطالبہ کیا ہے۔ ایک متاثرہ بچی کے گھر والوں کا کہنا ہے کہ انھیں اس واقعہ کا پتہ اس وقت چلا جب بچی ڈری سہمی ہوئی گھر آئی۔ جب اس سے اس کا سبب پوچھا گیا تو پورا قصہ ظاہر ہوا۔

اس پورے معاملے میں پولس کا کہنا ہے کہ ٹیچر کے خلاف معاملہ درج کر لیا گیا ہے۔ اس کے علاوہ پولس نے بتایا کہ ’’شروعاتی جانچ کے بعد ہم نے چائلڈ جسٹس ایکٹ کی دفعہ 75 اور ایس سی و ایس ٹی (انسداد ظلم) ایکٹ کی دفعہ 3 کے تحت اسکول ٹیچر کے خلاف معاملہ درج کیا گیا ہے۔ جب ہم نے پیر کے روز اسکول کا دورہ کیا تو ہم نے اسکول کے دروازوں کو بند پایا۔‘‘

معصوم بچوں کے ساتھ ظلم کی خبر جب پھیلی تو مقامی لوگوں کے ساتھ ساتھ متاثرہ طلبا کے اہل خانہ بھی اسکول انتظامیہ کے خلاف جمع ہوتے ہوئے نظر آئے۔ ایک طالبہ کے والد نے کہا کہ ’’چونکہ پورا اسکول احاطہ سی سی ٹی وی کیمرے کی نگرانی میں ہے، اس لیے ہم نے پولس کو ثبوت اکٹھا کرنے اور سخت کارروائی کرنے کے لیے فوٹیج کی جانچ کرنے کو کہا ہے۔‘‘