کئی ممالک میں محتاط نرمی کے اشارے

جرمنی میں کورونا وائرس سے متاثر ہونے والوں کی روزانہ تعداد میں مسلسل کمی واقع ہو رہی ہے۔ تازہ اعداد وشمار کے مطابق جرمنی میں گزشتہ 24 گھنٹوں کے دوران کُل 988 نئے کیسز سامنے آئے جبکہ اس سے ایک روز اس انفیکشن کا شکار ہونے والے افراد کی تعداد 1257 تھی۔

جرمنی میں اب کووڈ انیس میں مبتلا ہونے والوں کی مجموعی تعداد 158,758 تک پہنچ گئی ہے جن میں سے 114,500 افراد صحت یاب ہو چکے ہیں۔ اس مہلک بیماری کے سبب مجموعی اموات کی تعداد 6,126 ہے۔

دوسری طرف جرمنی میں لاک ڈاؤن میں نرمی کرتے ہوئے اب زیادہ تر دکانیں اور کاروبار کھول دیے گئے ہیں مگر ساتھ ہی یہ لازمی کر دیا گیا ہے کہ عوامی مقامات یا دفاتر اور دکانوں میں جانے والے چہرے پر ماسک استعمال کریں گے۔

اطالوی وزیراعظم کی طرف سے لاک ڈاؤن میں محتاط نرمی کا دفاع

اطالوی وزیراعظم جوزیپے کونٹے نے پہلی مرتبہ ملک میں کورونا وائرس سے متاثرہ ترین علاقے لومباردائی کا دورہ کیا ہے۔ وہاں انہوں نے ایک مرتبہ پھر لاک ڈاؤن میں محتاط نرمی کرنے کے اپنے فیصلے کا دفاع کیا ہے۔ اٹلی میں چار مئی سے لوگوں کو چہل قدمی کرنے کی اجازت دی گئی ہے جبکہ کئی بڑی کمپنیاں بھی پیداوار کا سلسلہ دوبارہ شروع کر دیں گی۔ اٹلی میں یورپ کا طویل ترین لاک ڈاؤن دس مارچ سے جاری ہے۔ اٹلی میں تقریبا ستائیس ہزار افراد کووڈ انیس سے ہلاک ہو چکے ہیں اور ان میں سے زیادہ تر کا تعلق لومباردائی سے تھا۔