پی ایم مودی کا برونئی میں ولی عہد حاجی المہتدی نے کیا استقبال، ایک بچی کو دیا آٹوگراف

وزیر اعظم نریندر مودی آج برونئی دورہ پر پہنچے جہاں ان کا شاندار استقبال کیا گیا۔ مہاجر ہندوستانیوں کے ایک گروپ نے گرمجوشی کے ساتھ پی ایم مودی سے ملاقات بھی کی اور ایک ہوٹل میں بچوں سے بھی ان کی ملاقات کی ویڈیوز سامنے آئی ہیں۔ ویڈیو میں پی ایم مودی بچوں سے بات چیت کرتے ہوئے اور چھوٹے بچوں کو گود میں لیتے ہوئے بھی دکھائی دے رہے ہیں۔ ایک بچی نے انھیں اپنے ہاتھوں سے بنائی ہوئی اسکیچ (تصویر) تحفے میں پیش کی۔ پی ایم مودی نے اس بچی کو اپنا آٹوگراف بھی دیا۔

پی ایم مودی آج جب برونئی دارالسلام پہنچے تو ایئرپورٹ پر ولی عہد شہزادہ حاجی المہتدی باللہ نے ان کا خیر مقدم کیا۔ پی ایم مودی نے اس تعلق سے سوشل میڈیا پلیٹ فارم ’ایکس‘ پر پوسٹ بھی کیا، جس میں انھوں نے لکھا ہے کہ ’’برونئی دارالسلام پہنچ گیا۔ ہمیں ہمارے ممالک کے درمیان مضبوط تعلقات کا انتظار ہے، خصوصاً تجارتی اور ثقافتی روابط کو فروغ دینے میں۔ میں ولی عہد شہزادہ ہز رائل ہائنیس پرنس حاجی المہتدی باللہ کا ایئرپورٹ پر میرا استقبال کرنے کے لیے شکریہ ادا کرتا ہوں۔‘‘

قابل ذکر ہے کہ پی ایم مودی دو دنوں میں برونئی دارالسلام اور سنگاپور کا دورہ کریں گے۔ اس دورہ کے تعلق سے پی ایم مودی کا کہنا ہے کہ ’’میں عزت مآب سلطان حاجی حسن البلقیہ سے ملاقات کے لیے پُرجوش ہوں۔ میں سنگاپور میں صدر تھرمن شنمگ رتنم، وزیر اعظم لارنس وونگ، سینئر وزیر لی سین لونگ اور ایمریٹس سینئر وزیر گوہ چوک ٹونگ کے ساتھ بات چیت کروں گا۔ ہم اہم شعبوں میں تعلقات کو مزید مضبوط بنانے کے خواہش مند ہیں۔‘‘