دہلی: اوکھلا میں شجرکاری مہم کی شروعات، 15 اگست تک چلے گا سلسلہ

دہلی کے جامعہ نگر، اوکھلا علاقہ میں شجر کاری مہم چلائی جا رہی ہے اور یہ سلسلہ 15 اگست تک جاری رہے گا۔ شجرکاری مہم کی یہ شروعات 26 جولائی کو ہوئی جب کچھ لوگوں نے اوکھلا میں شاہین باغ کے کچھ مقامات پر پودے لگائے۔ یہ مہم سماجی کارکن اور کانگریس کے جواں سال لیڈر آفتاب احمد صدیقی اور داؤد خان وغیرہ نے مل کر شروع کی ہے۔ ان کا مقصد دہلی کو سبزہ زار کرنا اور فضا میں موجود آلودگی کو ختم کرنا ہے۔

آفتاب احمد نے شجرکاری مہم سے متعلق کہا کہ ’’ہماری کوشش ہے کہ اوکھلا میں ماحولیاتی آلودگی کم ہو اور اس لیے 15 اگست تک اوکھلا ہیڈ سے ٹھوکر نمبر 9 اور جامعہ نگر کے کچھ دیگر علاقوں میں شجرکاری جاری رہے گا۔‘‘ انھوں نے مزید کہا کہ ’’150 پودوں کا آرڈر ابھی دیا جا چکا ہے اور اس کے بعد مزید پودوں کا آرڈر دیا جائے گا تاکہ دہلی کو ’گرین اینڈ کلین‘ بنایا جا سکے۔

آفتاب احمد اور داؤد خان کے علاوہ جمعہ کے روز سلیم خان، عامر خان، شہزاد خان اور سلیم خان وغیرہ نے اس شجر کاری مہم میں حصہ لیا اور وہاں موجود لوگوں کو اس کی اہمیت سے بھی واقف کرایا۔ ان لوگوں نے نہ صرف مقامی باشندوں سے ماحولیات کو بہتر بنانے کے لیے شجرکاری کا راستہ اختیار کرنے کی اپیل کی، بلکہ لگائے گئے پودوں کی حفاظت کے لیے بھی کہا۔