شام میں جرمن فوج بھیجنے کا امکان نہیں، جرمن وزیر خارجہ

جرمن وزیر خارجہ ہائیکو ماس کی اپنے امریکی ہم منصب مائیک پومپیو کے ساتھ ہونے والی اس میٹنگ میں بحر اوقیانوس کے آرپار کے معاملات کو فوقیت حاصل رہی۔

جرمن وزیر خارجہ نے مائیک پومپیو سے ملاقات کے دوران واضح کیا کہ برلن حکومت شام میں امریکی سرگرمیوں کی حامی تو ہے لیکن وہاں کسی اور ممکنہ کیمیائی حملے کے تناظر میں جرمن فوج بھیجنے کا امکان نہیں کیونکہ اس کے لیے پارلیمانی اجازت ضروری ہے۔ ماس کے مطابق ایسا امکان موجود ہے کہ جرمن پارلیمنٹ فوج روانہ کرنے کی منظوری نہیں دے گی۔ اس ملاقات میں دونوں ممالک نے اس پر اتفاق کیا کہ کیمیائی حملوں کو روکنا از حد ضروری ہے۔ اسی ملاقات میں شام میں روس اور ایران کی اثراندازی کو بھی زیر بحث لایا گیا۔

امریکی وزارت خارجہ کے مطابق جرمن اور امریکی وزرائے خارجہ کی ملاقات میں عالمی سلامتی کو درپیش خطرات پر بھی گفتگو کے علاوہ امریکا کی شمالی کوریا کے ساتھ جوہری ہتھیاروں سے دستبرداری کی کوششوں پر بھی فوکس کیا گیا۔ دونوں وزرائے خارجہ کی ملاقات تین اکتوبر کو امریکی دارالحکومت واشنگٹن میں ہوئی۔

جرمن اور امریکی وزرائے خارجہ کی یہ ملاقات ایک ایسے وقت میں ہوئی ہے جب تجارتی معاملات، اضافی محصولات، ایرانی جوہری ڈیل اور ایران پر امریکی اقتصادی پابندیوں کے معاملے پر برلن اور واشنگٹن حکومتوں کے تعلقات میں کھچاؤ پایا جاتا ہے۔

جرمن وزیر خارجہ نے واضح کیا کہ برلن ایران کے معاملے پر مختلف موقف اور راستہ اختیار کیے ہوئے ہے۔ یہ امر اہم ہے کہ جرمنی ٹرمپ انتظامیہ کے سن دو پندرہ کی ایرانی جوہری ڈیل سے علیحدگی اختیار کرنے پر تنقید کر چکا ہے۔ امریکی اقتصدی پابندیوں کے باوجود یورپ ایران کے ساتھ تجارتی معاملات جاری رکھنے کے لیے اپنا طریقہ کار وضع کر چکا ہے۔

ماس نے اس ملاقات سے قبل ایک ٹوئیٹ میں کہا تھا کہ یورپ کے باہر امریکا ہی جرمنی کا سب سے قریبی پارٹنر ہے۔ جرمن وزیر خارجہ آج جمعرات کو امریکا کے قومی سلامتی کے مشیر جان بولٹن سے بھی ملاقات کریں گے۔ اس کے علاوہ وہ امریکا کے ٹریڈ کے اعلیٰ اہلکار رابرٹ لائٹزر سے بھی ملاقات کریں گے۔