کانگریس کے ارکان پارلیمنٹ کا اجلاس کل منعقد ہوگا، سونیا گاندھی کریں گی صدارت

کانگریس پارٹی کے لوک سبھا کے ارکان پارلیمنٹ کا ایک اجلاس کل یعنی کہ 18 جولائی کو طلب کیا گیا ہے۔ یہ اجلاس ورچوئل طریقہ سے منعقد ہوگا اور کانگریس صدر سونیا گاندھی اس کی صدارت کریں گی۔

کانگریس کے سینئر لیڈر مدھیہ پردیش کے سابق وزیر اعلیٰ دگوجے سنگھ نے کہا، ’’آج کے ایشوز مہنگائی، بے روزگاری اور ویکسین ہیں۔ اس طرح کے اقدامات (پاپولیشن کنٹرول بل) اہم ایشوز سے توجہ ہٹانے کی کوشش میں لئے جا رہے ہیں۔ کانگریس کو عوامی اہمیت کے حامل معاملوں پر سڑک، عدالتوں، اسمبلیوں اور پارلیمنٹ میں لڑائی لڑنی چاہیئے۔‘‘

پرینکا گاندھی لکھنؤ سے لکھیم پور کھیری پہنچ چکی ہیں جہاں انہوں نے بلاک پرمکھ انتخابات کے دوران بدسلوکی کی شکار ہونے والی خواتین سے ملاقات کی۔ پرینکا گاندھی نے کانگریس کے ریاستی صدر اجے کمار للو کے ہمراہ پسگواں میں انیتا یادو اور ریتو سنگھ سے ملاقات کی۔

یوپی کانگریس کے ایک ٹوئٹ میں اس ملاقات کی تصاویر جاری کرتے ہوئے لکھا گیا، ’’پارٹی کے حساب سے نہیں درد کے حساب سے رشتہ نبانے والی لیڈر کا نام پرینکا گاندھی ہے۔‘‘ خیال رہے کہ ریتو یادو اور انیتا یادو سماج وادی پارٹ سے وابستہ ہیں اور بلاک پرمکھ انتخابات کے لئے کاغذات نامزدگی جمع کرنے کے دوران ان سے بدسلوکی کی گئی تھی۔

اتراکھنڈ حکومت نے واضح کیا ہے کہ اگر ریاستیں چاہیں تو ہریدوار سے گنگا جل لے جا سکتی ہیں، اس میں انتظامیہ ان کا تعاون کری گی۔ وزیر اعلیٰ اتراکھنڈ کے ایڈیشنل چیف سیکریٹری نے کہا ’’کانوڑ میلہ کے دوران اگر ریاستوں سے گنگا جل طلب کیا جاتا ہے تو ہم پورا تعاون کریں گے۔ ہریدوار سے پانی کے ٹینکروں کے ذریعے گنگا جل لے جانے کی اجازت فراہم کی جائے گی۔‘‘

خیال رہے کہ مرکزی حکومت نے گزشتہ روز سپریم کورٹ میں کہا تھا کہ کانوڑ یاترا کے حوالہ سے فیصلے ریاستوں کو لینے ہیں اور کورونا کے دور میں گنگا جل لوگوں تک پہنچانے کا نظام تیار کیا جا سکتا ہے۔ جبکہ سپریم کورٹ نے یوپی حکومت سے کانوڑ یاترا کو اجازت دینے کے فیصلہ پر نظر ثانی کرنے کی ہدایت دی ہے۔ اس معاملہ پر اگلی سماعت پیر کے روز ہوگی۔