زرعی قوانین پر آج اپنے تحفظات سے آگاہ کریں گے کسان، حکومت سے کل پھر ہوگی بات چیت

مرکزی حکومت اور کسان تنظیموں کے مابین گزشتہ روز ہونے والے مذاکرات بے نتیجہ رہے، جس کے بعد کسانوں نے کہا ہے کہ ان کی تحریک اس وقت تک جاری رہے گی جب تک یہ قوانین واپس نہیں ہو جاتے۔

کسان مورچہ آج مرکزی حکومت کو زرعی قوانین کے تئیں اپنے تحفظات سے آگاہ کرائے گا۔ بھارتیہ کسان یونین (سدھ پور جتھا) کے سربراہ جگجیت سنگھ دھالی وال نے بتایا کہ ہم نے کل ہونے والی میٹنگ میں اپنا موقف پیش کیا تھا، لیکن آج ہم ان کو تحریری طور پر اپنے تحفظات پیش کریں گے۔ کل حکومت کے ساتھ ایک مرتبہ پھر مذاکرات ہوں گے اور ہر نکتے پر تفصیل سے بات چیت ہوگی۔

نئے زرعی قانون کے خلاف کسانوں کا احتجاج ساتوے دن بھی جاری ہے اور مرکزی حکومت سےکل ہوئی بات چیت میں کوئی حل نہیں نکلا ہے۔ کسانوں نے کہا ہے کہ ان کی احتجاجی تحریک جاری رہے گی۔ ادھر خبر ہے کہ آج میوات کے کسان دہلی کوچ کریں گے ۔ حکومت نے اس پیش رفت کو دیکھتے ہوئے دہلی اور نویئڈا کا چلابارڈر بند کر دیا ہے۔ ادھر خبر ہے کہ کسانوں کی تحریک کی وجہ سے کچھ ٹرینوں کو کینسل کر دیا ہے۔