اہم خبریں: ’میرا سر شرم سے جھک گیا، بلقیس کے گنہگاروں کو پھانسی دو‘، سابق وزیر اعلیٰ اور بی جے پی لیڈر کا بیان

بلقیس بانو معاملے پر بی جے پی نے خاموشی اختیار کر رکھی ہے، لیکن پارٹی کے سرکردہ لیڈر اور ہماچل پردیش کے سابق وزیر اعلیٰ شانتاکمار نے اس واقعہ کے قصورواروں کو رِہا کرنے کی اجازت دینے والی گجرات حکومت کو تنقید کا نشانہ بنایا ہے۔ انھوں نے کہا کہ بلقیس بانو کیس کے قصورواروں کی رِہائی کے بارے میں سن کر میرا سر شرم سے جھک گیا ہے۔ یہ تاریخ کے سب سے بربریت والے جرائم میں سے ایک تھا۔ کوئی حکومت گنہگاروں کو اتنی چھوٹ کیسے دے سکتی ہے؟ گجرات حکومت کو اپنے فیصلے کو واپس لینا چاہیے اور معاملے میں قصوروار ٹھہرائے گئے لوگوں کو پھانسی پر لٹکا دینا چاہیے۔

بہار اسمبلی میں فلور ٹیسٹ کے پیش نظر ہوئی بحث میں حصہ لیتے ہوئے وزیر اعلیٰ نتیش کمار نے کئی باتوں کے لیے مرکزی حکومت کو تنقید کا نشانہ بنایا۔ انھوں نے یہ بھی کہا کہ آج سوشل میڈیا اور پریس پر حکومت کا کنٹرول ہے، وہاں صرف مرکزی حکومت کی ہی بات ہوتی رہتی ہے۔ ان حالات کو بدلنے کے لیے ہمیں مل کر لڑنا ہوگا۔

بہار اسمبلی میں نتیش کمار کی قیادت والی مہاگٹھ بندھن حکومت نے اعتماد کا ووٹ جیت لیا ہے۔ حکومت کی حمایت میں 160 ووٹ ڈالے گئے اور حزب مخالف کے حصے میں صفر ووٹ ملے۔ اپنے خطاب کے دوران وزیر اعلیٰ نتیش کمار نے بی جے پی کو شدید تنقید کا نشانہ بنایا۔ دلچسپ بات یہ ہے کہ بی جے پی نے ایوان سے واک آؤٹ کر دیا۔

بہار اسمبلی میں تیجسوی یادو نے سی بی آئی کی چھاپہ ماری پر سخت رد عمل ظاہر کیا ہے۔ انہوں نے کہا کہ جو ڈرے گا وہ مرے گا، جو لڑے گا وہ جیتے گا۔ انہوں نے کہا ک وہ کوئی رن آؤٹ نہیں ہونے والا۔ اس بار سب سے لمبی اننگ ہوگی۔

بہار اسمبلی میں اکثیر ثابت کرنے کے لئے فلور ٹیسٹ کا آغاز ہو گیا ہے۔ توقع کی جا رہی ہے کہ نتیش کمار آسانی کے ساتھ اکثریت ثابت کر دیں گے۔

کانگریس پارٹی کی پریس کانفرنس سے خطاب کرتے ہوئے پارٹی لیڈر راگنی نائک نے الزام عائد کیا کہ کیجریوال حکومت کی شراب مافیا سے ساز باز ہے۔ انہوں نے کہا کہ سی بی آئی تفتیش پر دہلی حکومت کے دل کیوں لرز جاتے ہیں، اسے یہ بتانا چاہئے کہ شراب پالیسی صحیح تھی یا غلط۔

بہار اسمبلی میں فلور ٹیسٹ سے قبل اسپیکر وجے سنہا نے اپنے عہدے سے استعفی دے دیا۔ انہوں نے کہا کہ وہ اس حکومت کے وجود میں آنے کے بعد بہت پہلے ہی استعفی دینا چاہتے تھے لیکن ارکان اسمبلی نے ان پر بیجا الزامات عائد کر دئے۔ ان کا جواب دینا ضروری تھا، اس لئے انہوں نے آج تک استعفی نہیں دیا۔

آر جے ڈی کے کئی لیڈروں کے خلاف سی بی آئی کی چھاپہ ماری کے درمیان بہار اسمبلی میں یوان کی کارروائی کا آغاز ہو گیا ہے۔ اسمبلی میں طلب کئے گئے خصوصی اجلاس کے دوران نتیش کمار کی قیادت والی عظیم اتحاد حکومت کو اکثریت ثابت کرنی ہوگی۔ دریں اثنا، اسمبلی اسپیکر وجے کمار سنہا نے ان کے خلاف پیش کی گئی عدم اعتماد کی تحریک کو خارج کر دیا ہے۔ وجے سنہا نے ایوان کو مطلع کیا کہ ان کے خلاف جو عدم اعتماد کی تحریک لائی گئی ہے وہ واضح نہیں ہے۔ انہوں نے کہا کہ 9 میں 8 لوگوں کی طرف سے انہیں ارسال کئے گئے خط واضح نہیں ہیں۔