اہم خبریں LIVE: بی ایس پی امیدوار کی موت کے بعد بیتول لوک سبھا حلقہ میں انتخاب ملتوی

مدھیہ پردیش کے بیتول لوک سبھا حلقہ سے بی ایس پی امیدوار اشوک بھلاوی کا 9 اپریل کو دل کا دورہ پڑنے سے انتقال ہو گیا۔ اس کے بعد ضلع الیکٹورل افسر نے انتخابی عمل منسوخ کر دیا ہے۔ ضلع الیکٹورل افسر اور ضلع کلکٹر نریندر سنگھ رگھوونشی نے بتایا کہ عوامی نمائندہ ایکٹ کے التزامات کے تحت انتخابی عمل روک دیا گیا ہے اور 26 اپریل کو ہونے والی ووٹنگ ملتوی کر دی گئی ہے۔ رگھوونشی نے کہا کہ الیکشن کمیشن آف انڈیا کی ہدایت کے مطابق آگے کی کارروائی کی جائے گی۔

گریٹر نوئیڈا کے تھانہ کاسنا میں منگل کے روز شدید آتشزدگی دیکھنے کو ملی۔ موقع پر پہنچی فائر بریگیڈ کی کئی گاڑیاں آگ پر قابو پانے میں مصروف ہیں۔ بتایا جا رہا ہے کہ آگ کے سبب تھانے کے اندر کھڑی کئی بائک اور دیگر سامان جل کر خاک ہو گئے۔ خوفناک آگ کے سبب فائر بریگیڈ کو اس پر قابو پانے میں سخت مشقت کرنی پڑ رہی ہے۔

دہلی ہائی کورٹ نے وزیر اعلیٰ اروند کیجریوال کی ای ڈی کی گرفتاری کے خلاف عرضداشت کو مسترد کر دیا ہے۔ ہائی کورٹ نے کیجریوال کی گرفتاری کو قانون کے مطابق بتاتے ہوئے یہ بھی کہا ہے اروند کیجریوال کی گرفتاری کے بعد ای ڈی کے ریمانڈ کو غیر قانونی نہیں کہا جا سکتا۔ ہائی کورٹ کے اس فیصلے کے خلاف عام آدمی پارٹی نے عدم اطمینان کا اظہار کیا ہے۔ عآپ کے لیڈر اور وزیر سوربھ بھاردواج نے دہلی ہائی کورٹ کے اس فیصلے کو سپریم کورٹ میں چیلنج کرنے کا اعلان کیا ہے۔

دہلی کے وزیر اعلیٰ اروند کیجریوال کو دہلی ہائی کورٹ نے راحت دینے سے انکار کر دیا ہے۔ انہوں نے ایکسائز پالیسی معاملے سے متعلق منی لانڈرنگ کیس میں اپنی گرفتاری کو ہائی کورٹ میں چیلنج کیا تھا۔ ہائی کورٹ نے کیجریوال کی عرضداشت کو مسترد کرتے ہوئے گرفتاری کو درست قرار دیا ہے۔ عدالت نے کہا کہ یہ ضمانت کا نہیں بلکہ گرفتاری کے چیلنج کا معاملہ ہے۔ ساتھ ہی ہائی کورٹ نے کہا کہ اروند کیجریوال کی گرفتاری کے بعد ای ڈی کے ریمانڈ کو غیر قانونی نہیں کہا جا سکتا۔

سپریم کورٹ نے مختار انصاری کے بیٹے عباس انصاری کو اپنے والد کی قبر پر فاتحہ خوانی کے لیے جیل سے باہر جانے کی اجازت دے دی ہے۔ انہیں منگل (9 اپریل 2024) کو شام 5 بجے سے پہلے سڑک کے ذریعے کاس گنج سے غازی پور کے لیے روانہ کیا جائے گا جبکہ بدھ (10 اپریل) کو فاتحہ پڑھنے کے بعد انہیں غازی پور جیل میں رکھا جائے گا۔ عباس انصاری کو 11 اور 12 اپریل کو جیل میں ان کے اہل خانہ سے ملنے کی اجازت دی جائے گی۔ انہیں 13 اپریل کو کاس گنج جیل واپس لایا جائے گا۔ سپریم کورٹ کے حکم کے مطابق اگر 11 یا 12 تاریخ کو کوئی مذہبی رسم ہوتی ہے تو عباس انصاری اس میں بھی شرکت کر سکیں گے۔

کانگریس کے لیڈر اور راجیہ سبھا کے رکن رندیپ سرجے والا نے وزیر اعظم مودی پر تنقید کرتے ہوئے کہا ہے کہ وزیراعظم نریندر مودی کا کام صرف کانگریس کو گالی دینا ہے جبکہ کانگریس کا کام ملک کی ترقی کرنا ہے۔ اب عوام کو ہی فیصلہ کرنا ہے کہ انہیں کس چیز کا انتخاب کریں۔

مہاراشٹر میں ایم وی اے کے درمیان سیٹوں کی تقسیم کا حتمی فیصلہ ہو گیا ہے۔ اس فیصلے کے تحت ریاست کی کل 48 لوک سبھا سیٹوں میں سے شیوسینا یو بی ٹی کو 21 سیٹیں ملی ہیں، کانگریس کے حصے میں 17 سیٹیں آئی ہیں جبکہ این سی پی شردپوار 10 سیٹوں پر الیکشن لڑے گی۔ تینوں پارٹیوں کے درمیان ریاست کی تین لوک سبھا سیٹوں بھیونڈی، سانگلی اور شمال ممبئی کی سیٹوں پر فیصلہ نہیں ہو پا رہا تھا، مگر اب تصویر واضح ہو گئی ہے۔ بھیونڈی این سی پی شرد پوار کے حصے میں آیا ہے، سانگلی کی سیٹ شیوسینا یو بی ٹی اور شمال ممبئی کی سیٹ کانگریس و ملی ہے۔

الیکشن کمیشن آف انڈیا نے اطلاع دی ہے کہ لوک سبھا انتخابات 2024 کے دوسرے مرحلے میں 13 ریاستوں/ مرکز کے زیر انتظام علاقوں میں 1210 امیدوار الیکشن لڑیں گے۔ کمیشن کے مطابق لوک سبھا انتخابات 2024 کے دوسرے مرحلے کے لیے 12 ریاستوں اور مرکز کے زیر انتظام علاقوں کے 88 پارلیمانی حلقوں کے لیے 2633 نامزدگی فارم داخل کیے گئے۔