اہم خبریں: اپنے ووٹ سے دکھا دیجئے کہ جمہوریت پر حملے کو کیسے روکا جاتا ہے! شرد پوار

این سی پی شردچندرپوار کے سربراہ نے کہا کہ اس حکومت نے اپوزیشن کے لیڈران کو جیل بھیجا۔ حکومت کا یہ ایکش ملک کی آئین پر حملہ ہے۔ یہ جمہوریت پر حملہ ہے۔ بابا صاحب امبیڈکر نے جو آئین ہمیں دیا ہے اس کے مطابق جب آئین و جمہوریت پر حملہ ہو تو ہر شہری کی ذمہ داری اسے بچانے کی ہوتی ہے۔ آج ملک میں جمہوریت کا قتل ہو رہا ہے اس لیے آپ جب پولنگ بوتھ میں جائیں تو اس بات کا خیال رکھیں کہ آپ اپنے ووٹ سے کس طرح جمہوریت کے خلاف حملے کو روک سکتے ہیں۔ اپنے ووٹ سے دکھا دیجیئے کہ جب ملک کی آئین پر حملہ ہوگا تو اس ملک کی عوام اس کو کیسے روکتی ہے۔ اپنے ووٹ سے دکھا دیجئے کہ جمہوریت پر حملے کو کیسے روکا جاتا ہے۔

اس تاریخی میدان میں آج جو ہم لوگ سب مل کر کھڑے ہوئے ہیں تو یہ اعلان ہونے والا ہے کہ حکمران جو دہلی میں بیٹھے ہوئے ہیں وہ اب زیادہ دن رکنے والے نہیں ہیں۔ آج ہم لوگ دہلی میں آّئے ہیں، سنا ہے دہلی والے دہلی سے باہر گئے ہیں۔ جو دہلی سے باہر گئے ہیں وہ ہمیشہ کے لیے جانے والے ہیں۔ جو نعرہ دیتے ہیں 400 پار، اگر آپ کے 400 ہونے تھے تو عام آدمی کے لیڈر سے آپ کو کیوں گھبراہٹ ہے۔ انہوں نے کہا کہ اترپردیش کے لوگوں نے بی جے پی کو موقع دیا انہیں سواگت کیا۔ لیکن اترپردیش کے لوگ اگر سواگت کرتے ہیں تو موقع آنے پر دھوم دھام سے رخصتی بھی کرتے ہیں۔ اکھلیش یادو نے کہا کہ بی جے پی دنیا کی ہی نہیں بلکہ کائنات کی سب سے جھوٹی پارٹی ہے۔

مارکسوادی کمیونسٹ پارٹی کے لیڈر سیتارام یچوری نے کہا کہ اس ملک کی جمہوریت کو برقرار رکھنا یہی ہماری آزادی ہے۔ انہوں نے کہا کہ اس ملک کے مسائل سے اگر ہمیں آزادی چاہئے تواس حکومت سے آزادی حاصل کرنی ہوگی۔ سیتارام یچوری نے مزید کہا کہ کلیوگ کے امرت کال میں  اتفاق سے زہر کا کلش اچھے  لوگوں کے ہاتھ میں آگیا ہے اور امرت کا کلش برے لوگوں کے ہاتھ چلا گیا ہے۔ اس امرت کے کلش کو ہمیں ان برے لوگوں کے ہاتھ سے لانا ہے اور ملک کی عوا م کے فائدے کے لیے اس امرت کا استعمال کرنا ہے۔ یہی مطلب ہے امرت کال کا۔ اس امرت کو اگر ہمیں حاصل کرنا ہے تو انڈیا الائنس کو کامیاب کرنا ہوگا۔

فاروق عبداللہ نے کہا کہ آج جو ہم لوگ یہاں جمع ہوئے ہیں تو ہمارا مقصد آئین کو بچانا ہے۔ آج آئین پر حملہ ہے۔ آج چیف جسٹس کو دھمکیاں دی جا رہی ہیں۔ آج انسان کو انسان سے لڑا یا جا رہا ہے۔ اس کے خلاف ہمیں آواز اٹھانی ہے۔ انہوں نے کہاکہ جب الیکشن آئے گا تو آپ اس بٹن کو دبائیے گا جو اس حکومت کو ہرائے اور آپ کی حکومت لائے۔ ہم سب کو مل کر اس ظلم کے خلاف جدو جہد کرنا ہے۔ ہم سب مل کر انڈیا اتحاد کو مضبوط کریں گے۔

 ٹی ایم سی کے ممبر پارلیمنٹ ڈیرک او برائن نے اس موقع پر اپنی تقریر میں پلوامہ کا معاملہ اٹھا یا اور جموں و کشمیر کے سابق گونر ستیہ پال ملک کے حوالے سے مودی حکومت پر سخت تنقید کی۔ انہوں کہا کہ مودی جی اپنی گھٹیا سیاست کے لیے 40 نوجوانوں کی جان لے لی۔ اگر وہ اپنے دعوے میں سچے ہیں تو وہ پلوامہ کے واقعے پر وہائٹ پیپر لائیں۔

جھارکھنڈ کی سابق وزیر اعلیٰ ہیمنت سورین کی اہلیہ کلپنا سورین نے اس موقع پر کہا کہ ڈاکٹر باباصاحب امبیڈکر کے آئین کی تمام ضمانتوں کو این ڈی اے کے ذریعے ختم کیا جا رہا ہے۔ انہوں نے کہا کہ اگر کوئی پارٹی خود کو سب سے طاقتور سمجھتی ہے تو اسے معلوم ہونا چاہئے کہ ملک کی عوام سب سے بڑی ہے۔ انہوں نے کہا کہ اگر اس ملک کو بچانا ہے، جمہوریت کو بچانا ہے تو اپنی طاقت کا استعمال کرنا ہے۔ انہوں نے کہا کہ ہیمنت سورین دو مہینے سے جیل میں ہیں، کیجریوال دس دنوں سے جیل میں ہیں لیکن ابھی تک ان پر کوئی الزام ثابت نہیں ہوسکا ہے۔ کلپنا سورین نے کہا کہ یہ تاناشاہ حکومت ہے اور اس تاناشاہی حکومت کو اکھاڑ پھیکنا ہے۔ انہوں نے نعرہ لگایا کہ کہ جھارکھنڈ جھکے گا نہیں ، انڈیا جھکے گا نہیں اور انڈیا ڈرے گا نہیں۔

راشٹریہ جنتادل کے لیڈر اور بہار کے سابق نائب وزیر اعلیٰ تیجسوی یادو نے وزیراعظم مودی پر سخت تنقید کرتے ہوئے کہا کہ یہ نعرہ لگارہے ہیں کہ اب کی بار 400 پار، مگر یہ آپ لوگوں کو طے کرنا ہے کہ یہ اگلی بار میں اقتدار میں رہیں گے یا اقتدار سے بے دخل کریں گے۔ انہوں نے کہ مرکزی ایجنسیوں کے ذریعے اپوزیشن کے لوگوں کو گرفتار کیا جا رہا ہے، مگر ہم ڈرنے والے نہیں ہیں۔ لیکن جب ملک کی عوام انہیں جواب دے گی تو مودی جی ہاتھ ملتے رہ جائیں گے۔ انہوں نے  کہا کہ بی جے پی کے لوگ جھوٹ بولنے والے لوگ ہیں۔ یہ لوگ آنکھ پھوڑ کر چشہ دیدیں گے اور کہیں گے کہ ہم نے لوگوں کو چشمہ دیا۔ انہوں نے کہا کہ مودی جی کی گارنٹی چائنیز مال کی طرح ہے، جب تک الیکشن ہے اس وقت تک ہی مودی کی گارنٹی ہے۔ اس موقع پر تجیسوی نے یادو ملک میں بیروزگاری کی رپورٹ بھی لوگوں کے سامنے پیش کی۔

انڈین یونین مسلم لیگ کے خرم انیس عمر نے اپنی مختصر تقریر میں نعرہ لگایا میں بھی کیجریوال، میں بھی ہیمت سورین۔ انہوں نے کہا کہ راہل گاندھی نے جو محبت کی دوکان کھولی ہے اس کا پیغام پورے ملک میں جائے گا

سنیتا کیجریوال نے اس موقع پر وزیر اعلیٰ اروند کیجریوال کا پیغام پڑھ کر سنایا۔ اس پیغام میں کیجریوال نے کہا کہ جیل میں بھارت ماتا کے بارے میں سوچتا ہوں، بھارت ماں بہت دکھی ہے۔ جب ملک کے لوگ 75 سال بعد بھی پریشان ہیں تو بھارت ماں کو دکھ ہوتا ہے۔ آیئے ہم سب مل کر نیا بھارت بناتے ہیں۔ ایک ایسا بھارت ہوگا جو پوری دنیا میں تعلیم کا مرکز ہوگا۔ آج میں دیش کے 140 کروڑ لوگوں کو نیا بھارت بنانے کی ایپل کرتا ہوں۔ انڈیا الائنس کے ذریعے ہم نئے بھارت کی تعمیر کریں گے۔ انڈیا صرف زبان پر نہیں بلکہ دل میں انڈیا ہے۔

کیجریوال نے اس موقع پر 6 گارنٹیاں پیش کی جس میں پورے دیش میں 24 گھنٹے بجلی، غریبوں کو مفت بجلی، غریبوں کو مفت تعلیم، محلہ کلینک اور سوپر اسپیشلٹی اسپتال کی تعمیر، سوامی ناتھن کمیشن کے مطابق ایم ایس پی طے کرنا اور کسانوں کو ان کی فصل کی بھرپور قیمت دینا نیز دہلی کو مکمل ریاست کا درجہ دلانا شامل ہے۔ یہ گارنٹیاں پیش کرنے کے بعد کیجریوال نے اپنے خط میں انڈیا الائنس کے لیڈروں سے معافی مانگی کہ ان سے مشورہ کئے بغیر میں نے یہ گارنٹیاں پیش کیں کیونکہ جیل میں رہنے کی وجہ سے یہ ممکن نہیں ہو سکا۔ انہوں نے اس کے لیے سبھی کا تعاون بھی طلب کیا۔

بی جے پی کو پریوار واد سے کوئی تکلیف نہیں ہے۔ بی جے پی کو صرف ایک پریوار سے تکلیف ہے۔ اگر بی جے پی کو پریوار واد سے تکلیف ہوتی تو سندھیا، دیوار وغیرہ جیسے لوگوں کو وہ اپنی پارٹی میں نہیں لیتے اور راج ناتھ سنگھ کا بیٹا سیاست میں نہیں ہوتا۔ اگر آج ادتیہ ٹھاکرے بی جے پی میں چلے جائیں تو بی جے پی کے پریوار واد پر کوئی فرق نہیں پڑے گا۔ بی جے پی کو صرف ایک پریوار سے تکلیف ہے اور وہ پریوار وہ ہے جس نے اس ملک کے لیے سب سے زیادہ قربانیاں دی ہیں۔ انہوں نے کہا کہ بی جے پی نے لوگوں سے جو وعدہ کیا تھا وہ پورا نہیں کیا بلکہ ملک کے نوجوانوں کے ہاتھوں میں ڈنڈا پکڑا دیا کہ جاؤ لوگوں کو مارو مگر ہم سے سوال مت کرو۔ انہوں نے کہا کہ ہمارے پاس میڈیا نہیں ہے، آپ لوگ ہمارے میڈیا ہیں۔

ادھو ٹھاکرے نے خطاب کرتے ہوئے کہا کہ ہماری بہنیں ہمت سے لڑ رہی ہیں تو بھائی کیسے خاموش بیٹھیں گے، پورا دیش ان کے ساتھ ہے۔ انہوں نے بی جے پی کو چیلنج کرتے ہوئے کہا کہ اگر بی جے پی میں ہمت ہے تو وہ یہ اعلان کرے کہ ای ڈی، سی بی آئی وغیرہ اس کی اتحادی ہیں۔ ادھوٹھاکرے نے کہا کہ ایک شخص اور ایک پارٹی کی حکومت ملک کے لیے خطرہ ہو گئی ہے۔ اگر ہم کو ملک بچانا چاہتے ہیں تو ہمیں ایک شخص اور ایک پارٹی کی حکومت کو ختم کرنا ہوگا اور ملی جلی حکومت لانی ہوگی۔ انہوں نے کہا کہ ہم چناؤ پرچار کے لیے نہیں آئے ہیں بلکہ دیش کو بچانے کے لیے آئے ہیں۔ انہوں نے  کسانوں سے اپیل کرتے ہوئے کہا کہ جس طرح بی جے پی نے آپ نے دہلی میں آنے سے روکا اسی طرح آنے والے الیکشن کے بعد بی جے پی کو دہلی آنے سے روکیے۔ ادھوٹھاکرے نے اس موقع پر بی جے پی کے چار سو پار کے نعرے کے جواب میں نعرہ دیا کہ ’’اب کی بار، بھاجپا تڑی پار‘‘

 رام لیلا میدان میں جاری انڈیا الائنس کی میگا ریلی سے خطاب کرتے ہوئے دہلی کانگریس کے صدر اروندر سنگھ لولی نے کہا کہ آج مرکزی حکومت ملک کی جمہوریت کو ختم کر رہی ہے۔ مرکزی ایجنسیوں کا استعمال کرتے ہوئے اپوزیشن کو ڈرا یا جا رہا ہے، انہیں گرفتار کیا جا رہا ہے۔ انہوں نے کہا کہ آنے والا انتخاب صرف پارٹیوں کے درمیان کا انتخاب نہیں ہے بلکہ یہ انتخاب یہ فیصلہ کرے گا کہ ہماری آنے والی نسلوں کا مستقبل کیسا ہوگا۔

انڈیا الائنس کی دہلی کے رام لیلا میدان میں میگا ریلی ہو رہی ہے۔ اس ریلی میں اروند کیجروال کی اہلیہ سنیتا کیجریوال اور سنجے سنگھ کی اہلیہ انیتا سنگھ اپنے شوہروں کے پیغام دیں گی جبکہ ہیمنت سورین کی اہلیہ کلپنا سورین بھی خطاب کریں گی۔ جبکہ اس ریلی کے بارے میں  کانگریس نے کہا کہ ’جمہوریت بچاؤ ریلی‘ کا مقصد کسی فرد کو بچانا نہیں ہے، بلکہ آئین اور جمہوریت کو بچانا ہے۔ اس ریلی میں کانگریس لیڈر سونیا گاندھی، ملکارجن کھڑگے اور راہل گاندھی موجود رہیں گے۔ ان کے علاوہ جھارکھنڈ کے سابق وزیر اعلیٰ ہیمنت سورین کی اہلیہ کلپنا سورین، اروند کیجریوال کی اہلیہ سنیتا کیجریوال، شیو سینا -یو بی ٹی کے سربراہ ادھو ٹھاکرے، سماج وادی پارٹی کے سربراہ اکھلیش یادو، آر جے ڈی لیڈر تیجسوی یادو، ٹی ایم سی لیڈر ڈیرک اوبرائن، بائیں بازو کے لیڈر سیتارام یچوری، این سی پی (پوار) کے شرد پوار سمیت کئی سینئر لیڈر موجود رہیں گے۔

دہلی کے رام لیلا میدان میں جاری انڈیا الائنس کی میگا ریلی میں انڈیا الائنس کی پارٹیوں کے تمام سرکردہ لیڈران پہنچ رہے ہیں۔ پی ڈی پی کے لیڈر محبوبہ مفتی پہنچ چکی ہیں۔

رام لیلا میدان میں انڈیا بلاک کی میگا ریلی ہو رہی ہے۔ اس ریلی میں شرکت کے یے سی پی آئی-ایم کی لیڈر برندا کرت  بھی پہنچیں۔ انہوں نے کہا کہ اس ریلی سے یہ پیغام ہے کہ پورے ملک کے لو گ اس آمر اور فرقہ پرست حکومت کے خلاف جمع ہوئے ہیں۔ دہلی میں یہ مہا ریلی اروند کیجریوال کی گرفتاری کے خلاف ہے۔ ہیمنت سورین کی گرفتاری، یو اے پی اے کا مسلسل استعمال اور ای ڈی-سی بی آئی کا غلط استعمال۔ یہ سب ظاہر کرتا ہے کہ اس حکومت کو خود پر اعتماد نہیں ہے۔

 رام لیلا میدان میں انڈیا الائنس کی میگاریلی کی شروعات ہو چکی ہے۔ پورا رام لیلا میدان انڈیا الائنس میں شامل پاریٹوں کے کارکنان سے بھرا ہوا ہے۔ پورے میدان میں الائنس میں شامل پارٹیوں خاص طور سے کانگریس و عام آدمی پارٹی کے پرچم لہرا رہے ہیں۔ لوگوں میں زبردست جوش وخروش ہے۔