اہم خبریں LIVE: گلمرگ میں برفانی طوفان سے تباہی، ایک کی موت، کئی غیر ملکی سیاح لاپتہ، ریسکیو آپریشن جاری

جموں و کشمیر کے گلمرگ میں برفانی طوفان اور برفانی تودے کی وجہ سے بڑی تباہی کا امکان ہے۔ اس طوفان سے سیاحوں میں خوف وہراس پھیلا ہوا ہے۔ اس برفانی طوفان کی وجہ سے ایک کی موت ہوگئی ہے جبکہ کئی غیر ملکی سیاح لاپتہ ہو گئے ہیں۔ ایس ڈی ایم کے مطابق دو غیر ملکی سیاح لاپتہ ہیں اور دو کو زندہ بچا لیا گیا ہے۔

برسوں تک بی ایس پی میں رہنے کے بعد بی جے پی ہوتے ہوئے سماج وادی پارٹی میں جانے والے سوامی پرساد موریہ نے اپنی نئی سیاسی پارٹی کا اعلان کردیا ہے۔ اس سے قبل 13 فروری کو سوامی پرساد موریہ نے سماج وادی پارٹی کے جنرل سکریٹری کے عہدے سے استعفیٰ دے دیا تھا۔ سوامی پرساد موریہ نے دہلی میں کارکنان کے ایک کانفرنس میں آئندہ لوک سبھا انتخابات سے متعلق اپنی منشا بھی ظاہر کر دی ہے۔ 3 دن قبل ہی سوامی پرساد موریہ نے ایس پی کی بنیادی رکنیت اور ایم ایل سی کے عہدے سے استعفیٰ دے دیا تھا۔

پریس کانفرنس سے خطاب کرتے ہوئے کانگریس کے خزانچی اجے ماکن نے کہا، ’’مودی حکومت اور انکم ٹیکس حکام نے کانگریس کے بینک کھاتوں سے 65.8 کروڑ روپے چرا لئے۔ اس معاملے میں ہم نے انکم ٹیکس اپیلاٹ ٹریبونل میں درخواست دائر کی تھی، جس کی سماعت 21 فروری کو ہونی تھی لیکن سماعت سے ایک دن پہلے ہی انکم ٹیکس کے افسران بینک کی شاخوں میں گئے اور انہیں دھمکی دی اور ڈیمانڈ ڈرافٹ کے ذریعے 65.8 کروڑ روپے جمع کر لیے۔‘‘

دہلی کے مبینہ شراب گھوٹالے معاملہ میں دہلی کے وزیر اعلی اروند کیجریوال کو ای ڈی کی جانب سے 7 واں سمن موصول ہوا ہے۔ ای ڈی نے انہیں سمن بھیج کر پیر کو پوچھ گچھ کے لیے بلایا ہے۔ اس سے پہلے اروند کیجریوال کو 19 فروری کو ای ڈی کے سامنے پیش ہونا تھا لیکن وہ پیش نہیں ہوئے۔

کانگریس لیڈر جے رام رمیش نے کہا ہے کہ ’’پچھلے کچھ دنوں میں مودی حکومت کی طرف سے کانگریس پارٹی پر 'ٹیکس ٹیرر' حملے ہو رہے ہیں۔ کانگریس پارٹی کو مالی طور پر کمزور کرنے کی سازش رچی جا رہی ہے۔ یہ معاشی طور پر کانگریس پارٹی کا قتل نہیں ہے بلکہ جمہوریت کا قتل عوام کے سامنے ہو رہا ہے۔ جے رام رمیش نے کہا کہ مودی حکومت کسانوں کے احتجاج اور بے روزگاری سے بوکھلائی ہوئی ہے۔‘‘

کانگریس کے لیڈر اجے ماکن نے کہا ہے کہ ’’کچھ دن پہلے میں نے پریس کانفرنس میں آپ کے ساتھ معلومات شیئر کی تھیں کہ کس طرح کانگریس کے تمام بینک اکاؤنٹس کو ضبط کیا گیا۔ آج بڑے دکھ کے ساتھ مجھے ملک کے عوام کو بتانا پڑ رہا ہے کہ بی جے پی حکومت نے تمام اپوزیشن پارٹیوں اور اہم اپوزیشن پارٹی کے خلاف معاشی دہشت گردی شروع کر دی ہے۔‘‘ اجے ماکن نے کہا ’’ہمارے 65.8 کروڑ روپے بی جے پی حکومت کی انکم ٹیکس اتھارٹی نے پرسوں ضبط کر لیے تھے اور ہمارے پارٹی کارکنوں کی رقم جو انہوں نے یو پی آئی کے ذریعے کراؤڈ فنڈنگ ​​کے تحت بھیجی تھی، اسے سیز کرلیا ہے۔