اہم خبریں LIVE: گرفتار کیجریوال کی کل پی ایم ایل اے کورٹ میں ہوگی پیشی، ای ڈی لاک اَپ میں گزرے گی آج کی رات

دہلی کے وزیر اعلیٰ اروند کیجریوال کو ای ڈی دفتر لے جایا گیا ہے اور آج کی رات انھیں ای ڈی لاک اَپ میں رکھا جائے گا۔ کل صبح انھیں پی ایم ایل اے کورٹ میں پیش کیا جائے گا جہاں ای ڈی افسران عدالت سے ریمانڈ کا مطالبہ کریں گے۔ عآپ کی طرف سے سپریم کورٹ میں ایک عرضی داخل کی گئی تھی جس میں اس معاملے پر آج ہی سماعت کا مطالبہ کیا گیا تھا، لیکن جیسی خبریں سامنے آ رہی ہیں اس میں بتایا جا رہا ہے کہ سپریم کورٹ آج رات سماعت نہیں کرنے والا۔ امید ظاہر کی جا رہی ہے کہ کل اس معاملے پر سپریم کورٹ میں سماعت ہو سکتی ہے۔

اروند کیجریوال کی گرفتاری کی خبر پھیلتے ہی اپوزیشن پارٹیوں نے مرکزی حکومت کو تنقید کا نشانہ بنانا شروع کر دیا ہے۔ کئی لیڈران نے لوک سبھا انتخاب سے عین قبل ای ڈی کی کارروائی پر سوال اٹھایا ہے۔ کانگریس رکن پارلیمنٹ راہل گاندھی نے اس معاملے میں تلخ تبصرہ کرتے ہوئے سوشل میڈیا پوسٹ کیا ہے کہ ’’ڈرا ہوا تاناشاہ، ایک مری ہوئی جمہوریت بنانا چاہتا ہے۔ میڈیا سمیت سبھی اداروں پر قبضہ، پارٹیوں کو توڑنا، کمپنیوں سے ہفتہ وصولی، اہم اپوزیشن پارٹی کا اکاؤنٹ فریز کرنا بھی ’اَسُری شکتی‘ (بری طاقت) کے لیے کم تھا، تو اب منتخب وزرائے اعلیٰ کی گرفتاری بھی عام بات ہو گئی۔‘‘ سوشل میڈیا پلیٹ فارم ’ایکس‘ پر کیے گئے اس پوسٹ کے آخر میں راہل گاندھی نے یہ بھی لکھا ہے کہ ’’انڈیا اس کا منھ توڑ جواب دے گا۔‘‘

عآپ کی گرفتاری کو لے کر عآپ کی لیگل ٹیم سرگرم ہو چکی ہے۔ دہلی حکومت میں وزیر آتشی نے جانکاری دیتے ہوئے بتایا ہے کہ ’’ہم نے ای ڈی کے ذریعہ دہلی کے وزیر اعلیٰ اروند کیجریوال کی گرفتاری کو رد کرنے کے لیے سپریم کورٹ کا رخ کیا ہے۔ ہم نے آج رات ہی سپریم کورٹ سے فوری سماعت کا مطالبہ کیا ہے۔‘‘

دہلی کے وزیر اعلیٰ اور عآپ کے قومی کنوینر اروند کیجریوال کو مرکزی جانچ ایجنسی ای ڈی نے آبکاری معاملے میں گرفتار کر لیا ہے۔ ای ڈی نے کیجریوال سے تقریباً دو گھنٹے تک پوچھ تاچھ کی اور پھر گرفتاری کی کارروائی ہوئی۔ اس گرفتاری کے بعد عآپ نے واضح کر دیا ہے کہ کیجریوال وزیر اعلیٰ بنے رہیں گے، یعنی وہ فی الحال استعفیٰ نہیں دینے والے۔ دہلی حکومت میں وزیر آتشی نے کہا کہ کیجریوال وزیر اعلیٰ تھے، ہیں اور رہیں گے۔

دہلی کے وزیر اعلیٰ اروند کیجریوال کے گھر ای ڈی کی ٹیم پہنچ گئی ہے اور ای ڈی افسران نے ان سے پوچھ تاچھ بھی شروع کر دی ہے۔ اس سے قبل دہلی ہائی کورٹ کی طرف سے کیجریوال کی گرفتاری پر روک لگانے کی عرضی خارج کر دی گئی تھی۔ بتایا جا رہا ہے کہ ٹیم سرچ وارنٹ لے کر پہنچی ہے اور وہ بنگلے کی تلاشی بھی لے سکتی ہے۔ اس معاملے میں دہلی کے وزیر سوربھ بھاردواج کا کہنا ہے کہ یہ وزیر اعلیٰ کی گرفتاری کی تیاری ہے۔ عآپ کی لیگل ٹیم اس معاملے میں سپریم کورٹ پہنچ گئی ہے۔

بی جے پی لیڈر سی ٹی روی کے خلاف ایف آئی آر درج کیے جانے کی خبریں سامنے آ رہی ہیں۔ اس سلسلے میں کرناٹک کے چیف الیکٹورل افسر نے جانکاری دیتے ہوئے سوشل میڈیا پر لکھا ہے کہ ’’بی جے پی لیڈر سی ٹی روی کے ذریعہ ایکس پر پوسٹ سے متعلق چکمگلور ڈی ای او نے 20 مارچ کو تعزیرات ہند کی دفعہ 153 اے اور آر پی ایکٹ کی دفعہ 126 کے تحت چکمنگلور ٹاؤن پولیس اسٹیشن میں ان کے خلاف ایف آئی آر درج کی ہے۔‘‘

ای ڈی کے سمن کے تعلق سے دہلی ہائی کورٹ میں داخل وزیر اعلیٰ اروند کیجریوال کی عرضداشت کی سماعت کے بعد ہائی کورٹ نے کیجریوال کو گرفتاری سے کوئی راحت نہیں دی۔ دورانِ سماعت ہائی کورٹ نے ای ڈی سے کہا تھا کہ اس کے پاس کیجریوال کے خلاف جو ثبوت ہیں وہ عدالت میں پیش کرے۔ جس کے بعد ای ڈی افسران نے ثبوتوں کی فائل عدالت میں پیش کی۔ ان کو دیکھنے کے بعد عدالت نے کہا کہ کیجریوال کو سمن کے جواب میں ای ڈی کے سامنے پیش ہونا پڑے گا اور یہ کہ ان کی گرفتاری پر کوئی روک نہیں ہے۔

لوک سبھا انتخابات کے ساتھ ہی چار ریاستوں کے اسمبلی انتخابات کا بھی اعلان ہوا تھا۔ ان ریاستوں میں آندھرا پردیش، اڈیسہ، ارونا چل پردیش اور سکم شامل ہیں۔ کانگریس نے آج ارونا چل پردیش اسمبلی انتخابات کے لیے اپنے امیدواروں کے ناموں کا اعلان کر دیا ہے۔

پارٹی اکاؤنٹ سیز معاملے پر کانگریس لیڈر راہل گاندھی نے مودی حکومت پر سخت حملہ کیاہے۔ انہوں نے کہا کہ ’’ہماری اسور شکتی سے لڑائی ہے۔ نفرت بھری اسور شکتی۔‘‘ انہوں نے یہ بھی کہا ہے کہ بھارت کے 20 فیصد لوگ ہمیں ووٹ دیتے ہیں لیکن ہم 2 روپے خرچ نہیں کر سکتے۔ تمام اداروں کا فرض ہے کہ اس کے بارے میں بات کریں۔ آپ کے آئین اور بنیادی حقوق کو لوٹا جا رہا ہے۔ کسی ادارے نے حتیٰ کہ الیکشن کمیشن و عدالت نے بھی کچھ نہیں کیا۔ 14 لاکھ روپے 7 سال پہلے کا معاملہ ہے اور جرمانہ 200 کروڑ روپے ہے۔  انکم ٹیکس ایکٹ کہتا ہے کہ زیادہ سے زیادہ جرمانہ 10 ہزار روپے ہے۔ راہل گاندھی نے کہا کہ یہ کارروائی ہندوستان کے پی ایم کر رہے ہیں۔

آچاریہ بال کرشن نے سپریم کورٹ میں ایک حلف نامہ داخل کرتے ہوئے کہا ہے کہ پتنجلی آیوروید کے گمراہ کن اشتہارات پر معافی مانگ لی ہے۔ اپنے حلف نامے میں انہوں نے کہا ہے کہ وہ اس بات کو یقینی بنائیں گے کہ مستقبل میں اس طرح کے اشتہارات جاری نہ ہوں۔ انہوں نے کہا کہ اس اشتہار کا مقصد صرف اس ملک کے شہریوں کو آیورویدک کمپنی کی مصنوعات کا استعمال کرکے صحت مند زندگی گزارنے کی طرف راغب کرنا تھا۔