اہم خبریں LIVE: بہار میں جنتا دل یو کو پھر لگا جھٹکا، ابھئے کشواہا نے پارٹی کے سبھی عہدوں سے دیا استعفیٰ

لوک سبھا انتخاب سے ٹھیک پہلے سابق مرکزی وزیر علی اشرف فاطمی نے جنتا دل یو چھوڑ کر نتیش کمار کو بڑا جھٹکا دیا تھا، اور اب آج سینئر لیڈر ابھے کشواہا نے بھی جنتا دل یو کو خیر باد کہہ دیا ہے۔ انھوں نے پارٹی کے سبھی عہدوں سے استعفیٰ دے دیا ہے اور جلد ہی آر جے ڈی میں شمولیت کا اشارہ دیا ہے۔

لوک سبھا انتخاب سے ٹھیک پہلے کانگریس کو ایک اور بڑی خوشخبری ملی ہے۔ جئے پرکاش پٹیل اور پپو یادو جیسی شخصیتوں کے بعد دانش علی نے بھی کانگریس کا ہاتھ تھام لیا ہے۔ اتر پردیش کے امروہہ سے رکن پارلیمنٹ دانش علی نے کانگریس میں شمولیت اختیار کر لی ہے۔ دانش علی کو بی ایس پی نے گزشتہ سال دسمبر میں پارٹی مخالف سرگرمیوں میں شامل ہونے کا الزام عائد کرتے ہوئے پارٹی سے معطل کر دیا تھا۔ اب ان کے کانگریس میں شامل ہونے سے نہ صرف پارٹی کو مضبوطی ملے گی، بلکہ آئندہ لوک سبھا انتخاب میں امروہہ اور اس کے آس پاس کی پارلیمانی سیٹوں پر بھی اس کا اثر دکھائی دے گا۔ دانش علی نے اتر پردیش میں کانگریس کو مضبوط کرنے کا عزم بھی ظاہر کر دیا ہے۔

 بہار کی سیاست میں سرگرم اور سیمانچل میں مضبوط اثر رکھنے والے راجیش رنجن عرف پپو یادو نے اپنی سیاسی پارٹی ’جن ادھیکار پارٹی‘ کو کانگریس میں ضم کر دیا ہے۔ اس سے قبل وہ خو د کو کانگریس کی نظریات کا حامل بتاتے رہے ہیں۔ آج دہلی میں کانگریس کے سینئر لیڈر پون کھیڑا نے انہیں کانگریس میں شامل کیا۔ اس موقع پر انہوں نے اپنی پارٹی کو کانگریس میں ضم کرنے کا اعلان کیا۔

مرکزی حکومت نے سپریم کورٹ میں سی ای سی و دیگر الیکشن کمشنرز ایکٹ 2023 پر روک لگانے کی درخواستوں پر حلف نامہ داخل کیا۔ اس ایکٹ پر روک لگانے کی درخواستوں کی مخالفت کرتے ہوئے مرکز کا کہنا ہے کہ الیکشن کمیشن یا کسی دوسرے ادارے یا اتھارٹی کی آزادی کا سلیکشن کمیٹی میں کسی عدالتی رکن کی موجودگی سے کوئی تعلق نہیں ہے۔

مرکزی وزیر کرن رجیجو نے فوڈ پروسیسنگ انڈسٹری کی وزارت کا اضافی چارج سنبھال لیا ہے۔ راشٹریہ لوک جن شکتی پارٹی کے سربراہ پشوپتی کمار پارس نے حال ہی میں لوک سبھا انتخابات میں سیٹوں کی تقسیم پر وزیر کے عہدے سے استعفیٰ دے دیا تھا، جس کے بعد یہ عہدہ خالی ہو گیا تھا۔

سپریم کورٹ نے یکم اپریل کو دہلی حکومت کی اس درخواست کو سننے کا فیصلہ کیا ہے جس میں دہلی جل بورڈ کے فنڈز جاری کرنے کی استدعا کی گئی ہے۔ دہلی حکومت کے لیے پیش ہونے والے سینئر وکیل ابھیشیک منو سنگھوی نے اس معاملے پر فوری سماعت کی درخواست کی ہے۔ سپریم کورٹ نے کہا ہے کہ وہ یکم اپریل کو اس معاملے کو فہرست میں شامل کرے گی اور اگر کوئی چیز قابل غور ہوئی تو فیصلہ پلٹا جا سکتا ہے۔

الیکشن کمیشن نے لوک سبھا انتخابات کے پہلے مرحلے کے لیے آج نوٹیفکیشن جاری کردیا ہے۔ اس پہلے مرحلے میں 102 سیٹوں پر انتخابات ہونے ہیں۔ اتر پردیش، بہار، مغربی بنگال، اتراکھنڈ اور اروناچل پردیش سمیت 21 ریاستوں کے امیدوار آج سے اپنا پرچۂ نامزدگی داخل کریں گے۔ پہلے مرحلے میں 21 ریاستوں اور مرکز کے زیر انتظام علاقوں میں 19 اپریل کو ووٹنگ ہونی ہے جبکہ نتائج کا اعلان 4 جون کو ہی کیا جائے گا۔