اہم خبریں LIVE: مغربی بنگال کی وزیر اعلیٰ ممتا بنرجی کو سر میں لگی چوٹ، اسپتال میں داخل

مغربی بنگال کی وزیر اعلیٰ ممتا بنرجی کے زخمی ہونے کی خبریں سامنے آ رہی ہیں۔ ترنمول کانگریس کی طرف سے کچھ تصویریں جاری کی گئی ہیں جس میں ممتا بنرجی کے زخمی ہونے کی اطلاع دی گئی ہے۔ تصویر میں ممتا بنرجی کے سر پر گہری چوٹ نظر آ رہی ہے جس سے خون بہہ رہا ہے۔ انھیں علاج کے لیے فوری طور پر اسپتال میں داخل کرایا گیا ہے۔

مرکزی حکومت کے ذریعہ پورے ملک میں ’سی اے اے‘ نافذ کرنے کا اعلان گزشتہ دنوں ہو چکا ہے، لیکن کچھ ریاستیں اس کو نافذ کرنے کے موڈ میں دکھائی نہیں دے رہی ہیں۔ کیرالہ کے وزیر اعلیٰ پینارائی وجین نے بھی اعلان کر دیا ہے کہ ریاست میں سی اے اے نافذ نہیں ہوگا۔ انھوں نے اپنے ایک بیان میں واضح لفظوں میں کہا ہے کہ ’’کیرالہ میں شہریت ترمیمی قانون نافذ نہیں کیا جائے گا۔‘‘

بہار کے وزیر اعلیٰ نتیش کمار سمیت قانون ساز انتخابات کے تمام 11 امیدواروں کو ریاستی قانون ساز کونسل کے لیے بلامقابلہ منتخب قرار دیا گیا ہے۔

 کانگریس کے سینئر لیڈر ادھیر رنجن چودھری نے الیکشن کمیشن (ای سی) کے اعلان سے پہلے بڑا دعویٰ کیا ہے۔ انہوں نے کہا ہے کہ الیکشن کمشنر کے لیے گیانیش کمار اور سکھبیرسندھو کے ناموں کو حتمی شکل دے دی گئی ہے۔ یہ بات انہوں نے جمعرات (14 مارچ 2024) کو میڈیا سے گفتگو کرتے ہوئے کہی۔

 مہاراشٹر کے ناسک میں کانگریس لیڈر راہل گاندھی نے کہا کہ ملک میں سب سے بڑا مسئلہ مہنگائی، بے روزگاری، حصہ داری اور کسانوں کا مسئلہ ہے لیکن اس پر کبھی کوئی بات نہیں کی جاتی ہے۔ پچھلے 10 سالوں میں پی ایم مودی کی حکومت نے آپ کا (کسانوں کا) کتنا قرضہ معاف کیا ہے؟ آج کسان دہلی کے رام لیلا میدان میں کھڑے ہیں۔ انہوں (مودی حکومت) نے آپ کے ایک روپے کا قرضہ بھی معاف نہیں کیا لیکن ارب پتیوں کا 16 لاکھ کروڑ روپے کا قرضہ معاف کر دیا۔