اہم خبریں: وکاس دوبے کی آخری رسومات ادا، بیوی نے کہا ”سب کا حساب کروں گی“

گینگسٹر وکاس دوبے کی آخری رسومات آج شام ادا ہو گئیں۔ میڈیا ذرائع کے مطابق اس کی لاش بھیرو گھاٹ واقع الیکٹرک کریمیٹوریم پہنچی جہاں اس سے سپرد آتش کر دیا گیا۔ اس موقع پر وکاس دوبے کی بیوی رچا اور اس کا نابالغ بیٹا موجود تھا۔ ہندی نیوز پورٹل 'نیوز18' پر شائع ایک رپورٹ کے مطابق ان دونوں کے علاوہ وکاس دوبے کا صرف ایک نزدیکی رشتہ دار وہاں موجود تھا۔ بتایا جاتا ہے کہ رچا دوبے اپنے شوہر کے انکاؤنٹر سے کافی ناراض ہیں اور انھوں نے میڈیا کے سامنے آ کر تو کچھ نہیں کہا لیکن دور سے ہی غصہ کا اظہار کرتے ہوئے کہا کہ "وقت آنے پر میں سب کا حساب کروں گی۔"

بدنام زمانہ ہسٹری شیٹر وکاس دوبے کی موت کے بعد ان کے سبھی اپنوں نے ساتھ چھوڑ دیا ہے۔ ایک طرف تو ان کی ماں سرلا دوبے نے کہہ دیا کہ وکاس دوبے سے ان کا کوئی لینا دینا نہیں ہے، دوسری طرف وکاس کی بیوی رچا دوبے نے لاش لینے سے منع کر دیا، اور اب خبر آ رہی ہے کہ وکاس کے والد نے بھی اس کی آخری رسومات میں شامل ہونے سے انکار کر دیا ہے۔ وکاس کے والد رام کمار نے آخری رسومات میں شامل ہونے سے منع کرنے کے ساتھ ساتھ یہ بھی کہہ ڈالا کہ "جو ہوا اچھا ہوا۔ صحیح کیا کہ پاپی مارا گیا۔"

ایک طرف تو بہار این ڈی اے میں سب کچھ ٹھیک نہیں چل رہا ہے اور دوسری طرف اب این ڈی اے میں شامل پارٹی ایل جے پی کے قومی صدر چراغ پاسوان نے کورونا وبا کی وجہ سے بہار اسمبلی الیکشن ملتوی کرنے کی خواہش کا اظہار کیا ہے۔ انھوں نے اپنے ایک ٹوئٹ میں لکھا ہے کہ "کورونا کی وجہ سے پورا بہار ہی نہیں، پورا ملک متاثر ہے۔ اس کی وجہ سے عام آدمی کے ساتھ مرکز اور بہار حکومت کا بجٹ بھی متاثر ہوا ہے۔ ایسے میں الیکشن سے ریاست پر اضافی بوجھ پڑے گا۔ الیکشن کمیشن کو اس سلسلے میں غور و خوض کر کے فیصلہ لینا چاہیے۔ ایسا نہ ہو کہ الیکشن کی وجہ سے بڑی آبادی کو پریشانی میں جھونک دیا جائے۔ اس سے پولنگ فیصد پر بھی اثر پڑے گا جو جمہوریت کے لیے ٹھیک نہیں ہوگا۔"

پولس انکاؤنٹر میں ہلاک بدنام زمانہ جرائم پیشہ وکاس دوبے کی لاش کا پوسٹ مارٹم جمعہ کو کانپور نگر پوسٹ مارٹم سنٹر میں کر دیا گیا۔ لیکن اس کی لاش لینے کے لیے نہ ہی ماں پہنچی، نہ باپ اور نہ ہی کوئی دوسرا رشتہ دار۔ کانپور میں 8 پولس اہلکاروں کے قتل کا اہم ملزم وکاس دوبے کو مدھیہ پردیش کے اجین سے کانپور لے کر آ رہے اتر پردیش پولس کے ایس ٹی ایف نے شہر سے تقریباً 18 کلو میٹر دور بارا پولس سرکل میں بھوتی کے پاس مار گرایا تھا۔ بتایا جاتا ہے کہ وکاس مبینہ طور پر سڑک حادثہ کا فائدہ اٹھا کر ایک پولس والے کی پستول چھین کر بھاگنے کی کوشش کر رہا تھا۔

کانپور: للّن واجپئی پر انتخابی دشمنی کی وجہ سے 2002 میں وکاس دوبے نے حملہ کر وایا تھا۔ آج وکاس دوبے کی موت پر للّن واجپئی نے کہا کہ آج ایسا لگتا ہے جیسے ہم صدیوں کے بعد آزاد ہوگئے ہیں۔ خوف و دہشت کے دور کا خاتمہ ہوگیا ہے اور پُر سکون دور کا آغاز ہوچکا ہے۔ اسی خوشی میں شام کو موسیقی کے ایک پروگرام کا اہتمام بھی کیا گیا ہے۔ للن واجپئی اس قدر خوش نظر آ رہے تھے کہ انہوں نے اپنی خوشی کے اظہار کے لئے لوگوں میں میٹھائی تقسیم کی۔

پرینکا گاندھی واڈرا نے ٹوئٹ کرتے ہوئے کہا کہ کانگریس پارٹی کا مطالبہ ہے کہ سپریم کورٹ کے موجودہ جج کے ذریعہ کانپور اسکینڈل کی عدالتی تحقیقات کرائی جائے۔ تاکہ جنہوں نے وکاس دوبے جیسے مجرموں کی پرورش کی ہے ان لوگوں کی اصلیت کا انکشاف ہونا چاہیے۔ جب تک سیاست دانوں اور مجرموں کے مابین گٹھ جوڑ کا پردہ فاش نہیں ہوتا ہے۔ تب تک انصاف نہیں ہوگا۔

دہلی کی ایک عدالت نے نظام الدین مرکز میں تبلیغی جماعت کے پروگرام میں حصہ لینے والے 82 بنگلہ دیشی شہریوں کی ضمانت منظور کرلی ہے۔ ہر ایک شخص کو دس ہزار روپے کے ذاتی مچلکے پر ضمانت دی گئی۔

یوپی کے اے ڈی جی، امن و امان پرشانت کمار نے بتایا کہ وکاس دوبے انکاؤنٹر میں 4 سول پولیس اہلکار زخمی ہوئے ہیں، جن میں 3 سب انسپکٹر، کانسٹیبل اور 2 ایس ٹی ایف کمانڈو شدید زخمی ہوئے ہیں۔

انہوں نے مزید بتایا کہ کانپور انکاؤنٹر میں مجموعی طور پر 21 ملزمان اور 60 سے 70 دیگر لوگ شامل تھے۔ جن میں سے اب تک 3 لوگوں کو گرفتار کیا جاچکا ہے، جبکہ 6 افراد انکاؤنٹر میں ہلاک ہو چکے ہیں، 7 افراد کو 120 بی کے تحت جیل بھیج دیا گیا ہے، 12 انعامی بدمعاش گرار چل رہے ہیں جن کی تلاش جاری ہے۔

نئی دہلی: بہوجن سماج پارٹی (بی ایس پی) کی قومی صدر مایاوتی نے اترپردیش کے کانپور واقعہ کی تحقیقات سپریم کورٹ کی نگرانی میں کروانے کا مطالبہ کرتے ہوئے کہا ہے کہ اس طرح شہید پولیس اہلکاروں کو انصاف مل سکے گا۔ مایاوتی نے جمعہ کے روز سلسلے وار ٹوئٹ میں کہا کہ پولیس اور جرائم اور سیاسی ربط و ضبط کی بھی تفتیش ہونی چاہیے۔

بی ایس پی کے رہنما نے کہا کہ کانپور پولیس کو ہلاک کیے جانے کا واقعہ اور ساتھ ہی اس کے اہم ملزم خونخوار وکاس دوبے کو مدھیہ پردیش سے کانپور لاتے وقت آج پولیس کی گاڑی کے پلٹنے اور اس کے بھاگنے پر پولیس کی جانب سے اسے مار گرائے جانے وغیرہ کے پورے معاملات کی سپریم کورٹ کی نگرانی میں غیر جانبدارانہ تحقیقات ہونی چاہیے۔

کانپور کے بیکرو گاؤں میں ایک مقابلے میں اپنی جان سے ہاتھ دھو بیٹھنے والے کانسٹیبل سلطان سنگھ کی اہلیہ ارمیلا ورما نے کہا کہ "میں مطمئن ہوں۔ لیکن اب یہ کیسے پتہ چلے گا کہ کون اس کا (وکاس دبے) ساتھ دے رہا تھا؟ کیونکہ اب اس سے پوچھ گچھ کرکے یہ انکشاف نہیں ہوسکتا ہے۔