1880 کے بعد جولائی رہا اب تک کا سب سے گرم مہینہ، امریکہ میں بھی گرمی نے توڑے سبھی ریکارڈ

امریکی خلائی ایجنسی ناسا نے جانکاری دی ہے کہ 1880 کے بعد سے جولائی اب تک کا سب سے گرم مہینہ رہا۔ اس سال امریکہ اور یوروپ کے کئی شہر لو اور جنگل کی آگ کی زد میں تھے۔ امریکہ میں اس سال گرمی نے سبھی ریکارڈ توڑ دیے۔ نیویارک میں ناسا کے گوڈارڈ انسٹی ٹیوٹ فار اسپیس اسٹڈیز (جی آئی ایس ایس) کے سائنسدانوں کے مطابق جولائی 2023 عالمی درجہ حرارت ریکارڈ میں کسی بھی دیگر مہینے کے مقابلے میں زیادہ گرم تھا۔

جولائی 2023 ناسا کے ریکارڈ میں کسی بھی دیگر ماہ کے مقابلے میں 0.24 ڈگری سلسیس زیادہ گرم تھا۔ یہ درجہ حرارت 1951 اور 1980 کے درمیان اوسط جولائی کے مقابلے میں 1.18 ڈگری سلسیس زیادہ رہا۔ اونچے درجہ حرارت کی ایک وجہ سمندر کی سطح کی گرمی بھی رہی۔ ناسا نے اپنے تجزیہ میں کہا ہے کہ مشرقی ٹروپیکل بحرالکاہل علاقہ میں گرم سمندری سطح کی درجہ حرارت مئی 2023 میں بڑھنا شروع ہوا تھا، جو النینو کا ثبوت ہے۔

ناسا ایڈمنسٹریٹر بل نیلسن نے کہا کہ ناسا ڈاٹا تصدیق کرتا ہے کہ دنیا بھر کے اربوں لوگوں نے حقیقت میں کیا محسوس کیا ہے۔ جولائی 2023 میں درجہ حرارت نے سبھی ریکارڈ توڑتے ہوئے اسے سب سے گرم مہینہ بنا دیا۔ امریکی ماحولیاتی بحران کے اثرات کا صاف طور پر تجربہ کر رہے ہیں۔

تجزیہ کے مطابق جنوبی امریکہ، شمالی افریقہ، شمالی امریکہ اور انٹارکٹیکا جزیرہ نما کے حصے خصوصی طور سے گرم تھے، جہاں درجہ حرارت اوسط سے تقریباً 4 ڈگری سلسیس زیادہ بڑھ گیا۔ مجموعی طور پر اس بہت زیادہ گرمی نے لاکھوں لوگوں کو متاثر کیا جو سینکڑوں لوگوں میں بیماریوں اور موت کی وجہ بنا۔

واشنگٹن ڈی سی میں ناسا ہیڈکوارٹر میں چیف سائنٹسٹ اور سینئر ماحولیاتی مشیر کیتھرین کیلون نے کہا کہ ماحولیاتی تبدیلی دنیا بھر کے لوگوں اور ماحولیاتی نظام کو متاثر کر رہا ہے۔ گوڈارڈ انسٹی ٹیوٹ فار اسپیس اسٹڈیز (جی آئی ایس ایس) کے ڈائریکٹر گیون شمٹ نے کہا کہ یہ ہمارے ریکارڈ میں 1880 کے بعد جولائی 2023 سب سے گرم مہینہ تھا۔