جھاڑ کھنڈ میں پانچ خواتین کا اغوا اور گینگ ریپ

مقامی پولس افسر راجیش پرشاد نے بتایا کہ یہ خواتین ایک غیر سرکاری تنظیم آشا کرن کے لیے کام کرتی ہیں جس کی معاونت ایک مقامی مسیحی مشنری گروپ کرتا ہے۔ پولس کے پاس درج ان خواتین کی شکایت میں کہا ہے کہ وہ انسانی اسمگلنگ کے خلاف ایک ڈرامے میں پرفارم کر رہی تھیں جب انہیں اغوا کیا گیا۔ کھنٹی کا ضلع ماؤ نواز مسلح باغیوں کا بھی گڑھ ہے۔

پولس افسر پرشاد کا کہنا ہے کہ وہ اس واقعے کے ذمہ داران تک پہنچنے کے لیے متعدد افراد سے پوچھ گچھ کر رہے ہیں۔ اطلاعات کے مطابق اغوا کاروں نے بلیک میلنگ کی غرض سےسارے واقعے کی ویڈیو بنائی اور خواتین کو پولس کے پاس جانے کی صورت میں دھمکی بھی دی۔

پولس نے علاقے میں پتھل گاڑی نامی ایک تحریک کے کچھ حامیوں کو بھی حراست لیا ہے۔ ’پتھل گاڑی‘ ایک فوج مخالف تحریک ہے جو متعدد قبائلی دیہاتوں میں مقبول ہے۔

مقامی پولس افسر راجیش پرشاد کا کہنا ہے کہ اغوا اور تشدد کا شکار ہونے والی خواتین کی طبی جانچ کی گئی ہے اور پولس کو نتائج کا انتظار ہے۔

جھاڑکھنڈ کے ضلع پاکور میں گزشتہ ماہ ایک سترہ سالہ لڑکی کو جنسی زیادتی کا نشانہ بنانے کے بعد مٹی کا تیل چھڑک کر آگ لگا دی گئی تھی۔

جنسی زیادتی اور اقدام قتل جیسے واقعات کی وجہ سے عوام میں غم وغصہ پایا جا رہا ہے۔ اگرچہ حکومت نے ایسے جرائم کے سدباب کے لیے قوانین سخت بنائے ہیں تاہم ان اقدامات کے باوجود ایسے جرائم کے واقعات میں کمی کے کوئی واضح پیش رفت سامنے نہیں آئی ہے۔