ہریانہ انتخابات: بڑی تعداد میں گھروں سے نکل کر لوگوں نے ڈالا ووٹ، 61.50 فیصد پولنگ درج

آج ہریانہ کی سبھی 90 اسمبلی سیٹوں پر ووٹ ڈالے گئے اور کچھ علاقوں میں تشدد کے واقعات کے درمیان مجموعی طور پر 61.50 فیصد پولنگ درج کی گئی۔ ہریانہ کے چیف الیکٹورل افسر نے یہ اعداد و شمار جاری کیا ہے اور کہا ہے کہ یہ حتمی نمبر نہیں ہے، بلکہ کچھ بوتھ سے ووٹنگ کی جانکاری ملنا باقی ہے۔ یعنی پولنگ کے فیصد میں مزید اضافہ ممکن ہے۔ سی ای او نے یہ بھی مطلع کیا کہ یمنا نگر میں سب سے زیادہ 69.91 فیصد ووٹ ڈالے گئے اور میوات (نوح) دوسرے مقام پر رہا جہاں 68.28 فیصد ووٹ پڑے۔ سب سے کم گروگرام میں 49.97 فیصد ووٹنگ ہوئی۔

ہریانہ میں اسمبلی کی 90 سیٹوں کے لیے آج ووٹنگ ہو رہی ہے اور حق رائے دہی کا آخری وقت چل رہا ہے۔ کچھ مقامات پر 6 بجے ووٹنگ کا عمل انجام پا گیا، لیکن جہاں لوگ اب بھی قطار بند ہیں وہاں ووٹ ڈالے جا رہے ہیں۔ الیکٹورل افسران کے ذریعہ دی گئی جانکاری کے مطابق شام 5 بجے تک تقریباً 61 فیصد پولنگ درج کی گئی ہے۔ اس سے ظاہر ہے کہ لوگ بڑی تعداد میں گھروں سے نکل کر اپنا حق رائے دہی استعمال کرنے پولنگ مراکز تک پہنچے۔ چند گھنٹوں بعد ووٹنگ کا حتمی فیصد سامنے آ جائے گا۔

ہریانہ میں سہ پہر 3 بجے تک 49.13 فیصد ووٹنگ درج کی گئی ہے۔ میوات میں سب سے زیادہ 56.59 فیصد ووٹنگ کی گئی ہے۔

دوپہر ایک بجے تک ہریانہ میں 36.69 فیصد ووٹنگ ریکارڈ کی گئی ہے۔ امبالہ میں 39.47 فیصد، بھیوانی میں 38.27 فیصد، چرخی دادری میں 29.62 فیصد، فرید آباد میں 31.71 فیصد، گروگرام میں 27.70 فیصد، حصار میں 38.34 فیصد اور جند میں 41.93 فیصد پولنگ ریکارڈ کیا گیا ہے۔

ہریانہ میں اسمبلی انتخابات کے تحت ووٹنگ کا عمل جاری ہے اور صبح 11 بجے تک ووٹنگ کی شرح 22.70 فیصد ریکارڈ کی گئی ہے۔ امبالہ میں 25.50 فیصد، بھیوانی میں 23.45 فیصد، چرخی دادری میں 20.10 فیصد، فرید آباد میں 20.39 فیصد، گروگرام میں 17.05 فیصد اور حصار میں 24.69 فیصد پولنگ درج کیا گیا ہے۔ پولنگ سٹیشنوں پر لوگوں کی بھیڑ دکھائی دے رہی ہے اور لوگ ووٹ ڈالنے کے لیے لمبی قطاروں میں کھڑے ہیں۔

روہتک میں ایک پولنگ بوتھ پر اپنا ووٹ ڈالنے کے بعد ہریانہ کے سابق وزیر اعلی اور کانگریس لیڈر بھوپیندر سنگھ ہڈا نے کہا، ’’میں لوگوں سے اپیل کرتا ہوں کہ وہ گھروں سے باہر آئیں اور پرامن طریقے سے ووٹ دیں۔ لوگ اچھی تعداد میں ووٹ ڈال رہے ہیں۔ یہاں کانگریس اپنی حکومت بنانے جا رہی ہے۔ بی جے پی ہریانہ سے جا رہی ہے اور کانگریس آ رہی ہے۔‘‘

ہریانہ اسمبلی انتخابات کے لیے ووٹنگ کے درمیان کانگریس صدر ملکارجن کھڑگے نے ایک پر ایک پوسٹ میں لکھا، ’’ہریانہ اسمبلی انتخابات میں آج ووٹنگ ہو رہی ہے۔ میں ہریانہ کی چھتیس برادریوں سمیت تمام لوگوں سے اپیل کرتا ہوں کہ وہ اپنا ووٹ ضرور ڈالیں۔ آپ کا ایک ووٹ ہریانہ کو خوشحالی اور سماجی انصاف کی راہ پر لے جائے گا۔‘‘

انہوں نے مزید کہا، ’’ای وی ایم میں ووٹ ڈالنے سے پہلے یاد رکھیں کہ گزشتہ 10 سالوں میں ہریانہ میں بے روزگاری، مہنگائی، کرپشن، پیپر لیک، دیہاتوں اور شہروں کی خراب حالت، شناختی کارڈ کا فراڈ، خواتین کی عدم تحفظ، سماجی امتیاز اور معاشی عدم مساوات کے علاوہ کچھ نہیں ہوا ہے۔ یہ اقتدار کے لالچ کی وجہ سے ہریانہ کی ترقی تقسیم ہوئی ہے۔ آج آپ کا ایک ووٹ یہ سب ختم کر دے گا۔‘‘

بی ایس پی صدر مایاوتی نے ایکس پر پوسٹ کر کے ہریانہ کے لوگوں سے ووٹ دینے کی اپیل کی ہے۔ مایاوتی نے کہا کہ ہریانہ اسمبلی کے عام انتخابات کے لیے آج ہونے والی ووٹنگ میں سماج کے تمام رائے دہندگان کو بڑی تعداد میں اپنا ووٹ ڈالنا چاہیے اور صحیح اور اچھے لوگوں کو جتانا چاہیے، تاکہ ملک میں جمہوریت اور اس کا انسانیت پسند آئین زندہ و سلامت رہے۔

کانگریس امیدوار ونیش پھوگاٹ بھی ہریانہ میں ووٹنگ کے دن اپنا ووٹ ڈالنے کے لیے صبح سویرے پہنچیں۔ انہوں نے کہا کہ یہ موقع ہریانہ کے لیے جشن جیسا ہے۔ ونیش نے لوگوں سے گھروں سے باہر نکل کر ووٹ ڈالنے کی اپیل کی۔ ونیش نے کہا کہ 10 سال پہلے جب ہڈا وزیر اعلیٰ تھے تو ریاست میں کھیلوں کی حالت اچھی تھی۔

وزیر اعظم نریندر مودی نے سوشل میڈیا پلیٹ فارم ایکس پر ایک پوسٹ میں لکھا، ’’آج ہریانہ اسمبلی انتخابات کے لیے ووٹنگ ہو رہی ہے۔ میں تمام ووٹرز سے اپیل کرتا ہوں کہ وہ جمہوریت کے اس مقدس تہوار کا حصہ بنیں اور ووٹنگ کا نیا ریکارڈ قائم کریں۔ اس موقع پر ریاست کے ان تمام نوجوان دوستوں کو میرا خصوصی سلام ہے جو پہلی بار ووٹ ڈالنے جا رہے ہیں۔‘‘

اولمپک میڈلسٹ اور ہندوستانی شوٹر منو بھاکر نے ہریانہ کے انتخابات کے لیے جھجر کے ایک پولنگ بوتھ پر اپنا ووٹ ڈالا۔ وہ اپنے والدین کے ساتھ ووٹ ڈالنے آئی تھی۔ منو بھاکر نے اس موقع پر کہا، ’’ملک کے نوجوانوں کی حیثیت سے یہ ہماری ذمہ داری ہے کہ ہم اپنے بہترین امیدوار کو ووٹ دیں۔ انہوں نے کہا کہ چھوٹے اقدامات سے ہی بڑے مقاصد حاصل کیے جا سکتے ہیں۔‘‘

ہریانہ اسمبلی انتخابات کے لیے ووٹنگ شروع ہو گئی ہے۔ سابق وزیر اعلیٰ منوہر لال کھٹر نے کرنال کے پریم نگر میں بنائے گئے پولنگ بوتھ پر اپنا ووٹ ڈالا۔ ووٹ ڈالنے کے بعد انہوں نے کہا، ’’لوگوں کو آج ووٹ دینا چاہیے۔ انتظامیہ نے تمام انتظامات کر لیے ہیں اور انتخابات پرامن طریقے سے ہوں گے۔ بی جے پی کو جیت کا یقین ہے اور ہم ریاست میں تیسری بار حکومت بنائیں گے۔ بی جے پی اس بار 50 سے زیادہ سیٹیں جیت لے گی۔‘‘

ہریانہ اسمبلی انتخابات کے لیے ووٹنگ صبح 7 بجے شروع ہو چکی ہے، جوکہ شام 6 بجے تک جاری رہے گی۔ ریاست کے تقریباً 2 کروڑ ووٹرز اپنے حق رائے دہی کا استعمال کر رہے ہیں۔

ہریانہ میں اسمبلی انتخابات کے پیش نظر پولنگ مراکز اور اہم مقامات پر مناسب پولیس فورس تعینات کی گئی ہے۔ ریاست میں 3460 پولنگ اسٹیشنوں کو حساس اور 138 انتہائی حساس قرار دیا گیا ہے، جس کی وجہ سے اضافی حفاظتی اقدامات کیے گئے ہیں۔ 186 بین ریاستی اور 215 بین ریاستی چوکیاں بنائی گئی ہیں، جہاں پولیس ٹیمیں سرگرمیوں پر کڑی نظر رکھیں ہوئے ہیں۔ لاء اینڈ آرڈر کو برقرار رکھنے اور ماڈل ضابطہ اخلاق کی تعمیل کو یقینی بنانے کے لیے، 507 فلائنگ اسکواڈ، 464 اسٹیٹک سرویلنس ٹیمیں اور 32 کوئیک ری ایکشن ٹیمیں بھی تشکیل دی گئی ہیں۔ اس کے علاوہ، 1156 پٹرولنگ ٹیمیں سرگرمی سے صورتحال پر نظر رکھے ہوئے ہیں۔

ہریانہ میں اسمبلی کی تمام 90 سیٹوں کے لیے ووٹنگ ہو رہی ہے۔ اس الیکشن میں وزیر اعلیٰ نائب سنگھ سینی، سابق وزیر اعلیٰ بھوپیندر سنگھ ہڈا اور کانگریس کی ونیش پھوگاٹ اور جے جے پی کے دشینت چوٹالہ سمیت کل 1031 امیدواروں کی قسمت داؤ پر لگی ہوئی ہے۔ ان میں سے 464 آزاد امیدوار ہیں۔ اس الیکشن میں 2 کروڑ سے زیادہ ووٹر ووٹ ڈالیں گے۔ حکمراں بی جے پی ریاست میں فتوحات کی ہیٹ ٹرک لگانا چاہتی ہے جبکہ کانگریس کو ایک دہائی کے بعد واپسی کی امید ہے۔ اس الیکشن میں بنیادی طور پر بی جے پی، کانگریس، عآپ، آئی این ایل ڈی-بی ایس پی اور جے جے پی-آزاد سماج پارٹی شامل ہیں۔ ووٹوں کی گنتی 8 اکتوبر کو ہوگی۔