ٹرمپ اقوام متحدہ کو ’تباہ کرنے سے باز‘ رہیں، جرمن چانسلر

جرمن چانسلر انجیلا میرکل کا گزشتہ روز باویریا میں علاقائی انتخابی مہم کے دوران کہنا تھا، ’’میرے خیال میں کوئی نئی چیز تشکیل دیئے بغیر کسی بنی ہوئی چیز کو تباہ کرنا انتہائی خطرناک عمل ہے۔‘‘

چانسلر میرکل کا اقوام متحدہ میں صدر ٹرمپ کی تقریر کو شدید تنقید کا نشانہ بناتے ہوئے کہنا تھا کہ ’’اقوام متحدہ پر حملہ عالمی امن کے لیے خطرہ ہے۔‘‘

چانسلر میرکل کا کہنا تھا کہ ٹرمپ ’وِن وِن سیچوایشن‘ سے ناواقف ہیں بلکہ وہ صرف اور صرف اپنی جیت کے متمنی رہتے ہیں۔ انہوں نے کہا کہ صدر ٹرمپ کی موجودہ پوزیشن سے عالمی مسائل حل نہیں کیے جاسکتے۔ جرمنی کی خاتون چانسلر نے ٹرمپ کو اقوام متحدہ پر مزید ’حملے‘ کرنے سے بھی خبردار کیا ہے۔

یاد رہے کہ اقوام متحدہ کی جنرل اسمبلی میں صدر ٹرمپ نے تقریر کرتے ہوئے اس ادارے کی کارکردگی اور موجودگی پر ہی سوالیہ نشانہ اٹھا دیئے تھے۔ ان کا کہنا تھا کہ ان کی انتظامیہ نے ’عالمگیریت کے نظریے کو مسترد کرتے ہوئے قوم پرستانہ نظریے کو اپنایا ہے۔‘‘ میرکل کا کہنا تھا کہ جس وقت بہت سی چیزوں پر سوالیہ نشان اٹھا دیئے جائیں تو وہ ’خطرناک وقت‘ ہوتا ہے۔

جرمن چانسلر امریکی صدر کی پالیسیوں سے اختلاف کرنے کے بعد اقوام متحدہ کے سکریٹری جنرل انٹونیو گوٹیرش کے کیمپ میں شامل ہو گئی ہیں۔ انہوں نے بھی امریکی صدر کی تقریر سے پہلے خبردار کرتے ہوئے کہا تھا، ’’آج ورلڈ آرڈر تیزی سے افراتفری کا شکار ہو رہا ہے۔‘‘

چانسلر میرکل کا خطاب کرتے ہوئے کہنا تھا کہ عوام یورپی یونین پر پختہ یقین رکھیں لیکن ساتھ ہی انہوں نے یورپی یونین میں اصلاحات کو وقت کی ضرورت قرار دیا ہے۔

جرمن چانسلر کا یورپی یونین کی اہمیت پر زور دیتے ہوئے کہنا تھا، ’’یورپ اپنی اقدار، اپنے موقف اور اپنے مفادات پر اسی وقت تک عمل پیرا رہ سکتا ہے، جب ہماری سلامتی اور خارجہ پالیسی ایک جیسی ہوگی۔‘‘