کسان تحریک: کسانوں نے بنائی اپنی چیک پوسٹ، ہر آنے جانے والے پر رکھی جا رہی نظر!

دہلی کو غازی آباد سے جوڑنے والے یو پی گیٹ پر نئے زرعی قوانین کے خلاف گزشتہ ایک مہینے سے دھرنے پر بیٹھے کسانوں کی بھیڑ دن بہ دن بڑھتی جا رہی ہے۔ کسانوں کا مظاہرہ ایکسپریس وے پر تقریباً ایک کلو میٹر میں پھیل چکا ہے۔ اس درمیان سیکورٹی کو لے کر پولس کے ساتھ ساتھ کسان بھی مستعد نظر آ رہے ہیں۔ یہی وجہ ہے کہ کسان مظاہرین نے ایکسپریس وے پر غازی آباد سے دہلی جانے والی لین پر کسانوں کی بھیڑ سے کچھ دوری پر اپنی دو چیک پوسٹ بنائی ہے۔ ان چیک پوسٹ کے ذریعہ کسان دھرنا کے مقام پر جانے والی گاڑیوں کی شناخت کرنے کے بعد ہی انھیں آگے جانے دے رہے ہیں۔ عام لوگوں کے لیے پولس نے یہ لین نوئیڈا میں ماڈل ٹاؤن کے پاس سے ہی بند کی ہوئی ہے۔

زرعی قوانین کے خلاف دہلی کی سرحدوں پر تو کسانوں کا مظاہرہ جاری ہے ہی، ناراض کسان ملک کی دیگر ریاستوں میں بھی مظاہرے کر رہے ہیں۔ اس درمیان پنجاب میں موبائل ٹاور کے ساتھ توڑ پھوڑ جیسے واقعات سامنے آئے جس پر پنجاب کے وزیر اعلیٰ کیپٹن امرندر سنگھ نے میڈیا سے بات کرتے ہوئے کہا کہ ’’کیا ہم کسانوں کے لیے ذمہ دار ہیں، پارلیمنٹ میں بل کس نے پاس کیے؟ اگر آپ کسانوں کی سوچ کو سامنے نہیں رکھو گے تو ایسے ہی واقعات ہوں گے۔ ٹاور اب کافی حد تک کنٹرول میں ہیں، 200 ٹاور ٹھیک ہونے رہ گئے ہیں۔‘‘

سنیوکت کسان مورچہ کے لیڈروں نے کہا ہے کہ نئے سال کے موقع پر مظاہرین کسان مشعل جلوس نکالیں گے تاکہ اپنی بات بہتر اور پرسکون انداز میں حکومت تک پہنچا سکیں۔ علاوہ ازیں اکھل بھارتیہ کسان سنگھرس کوآرڈنیشن کمیٹی نے راجستھان-ہریانہ بارڈر پر پولس کے ذریعہ کسانوں پر کیے گئے لاٹھی چارج کی سخت الفاظ میں مذمت کی۔ کمیٹی کے اعلیٰ افسران نے کہا کہ استحصال سے کسانوں کا عزم گھٹنے کی جگہ مزید بڑھے گا۔

آج سلمان خورشید دہلی میں زرعی قوانین کے خلاف مظاہرہ کر رہے پنجاب سے آئے کانگریس لیڈروں سے ملاقات کے لیے پہنچے۔ انھوں نے اس دوران میڈیا سے بات کرتے ہوئے کہا کہ ’’حکومت کے پاس کسانوں کے مفاد کے لیے منصوبہ ہے تو وہ بات کرے، کسانوں سے بات نہ کرنے کا مطلب ہے کہ کسانوں کے مفاد کے لیے حکومت کے پاس کوئی منصوبہ نہیں ہے۔‘‘

شاہجہاں پور میں کسان مظاہرین نے پولس کے ذریعہ لگائے گئے بیریکیڈ کو ناراضگی کے سبب اس وقت توڑ دیا جب وہ ہریانہ میں داخل ہونے میں ناکام ہوئے۔ میڈیا ذرائع سے موصول ہو رہی خبروں کے مطابق راجستھان-ہریانہ بارڈر پر بڑی تعداد میں کسان جمع تھے اور ہریانہ میں داخل ہونا چاہ رہے تھے لیکن پولس بیریکیڈ کو دیکھ کر وہ ناراض ہو گئے۔ مظاہرین نے بیریکیڈ توڑ کر آگے بڑھنے کی کوشش کی جس کو دیکھتے ہوئے پولس نے آنسو گیس کے گولے بھی داغے۔

ہریانہ کے وزیر اعلیٰ منوہر لال کھٹر نے اپنے بیان میں کہا، ’’ہم ہریانہ میں ایم ایس پی کو جاری رکھنے کے لئے عہد مند ہیں۔ اگر کسی نے بھی ایم ایس پی نظام کو ختم کرنے کی کوشش کی تو منوہر لال سیاست چھوڑ دے گا۔‘‘

کسان تحریک کے پیش نظر دہلی ٹریفک پولیس نے رہنما ہدایات جاری کی ہیں۔ ان کے مطابق سنگھو، اوچندی، پیاؤ منیاری، سبولی اور منگیش بارڈر کو بند کر دیا گیا ہے۔ اس راستہ پر آنے والے لوگوں کو لامپور، صافی آباد پلا اور انگھو اسکول ٹول ٹیکس بارڈر والے راستہ سے سفر کرنے کی ہدایت دی گئی ہے۔

مکربا اور جی ٹی کے روڈ کے ٹریفک کا رخ بھی تبدیل کیا گیا ہے۔ لوگوں کو باہری رنگ روڈ، جی ٹی کے روڈ اور این ایچ 44 پر جانے سے بھی اجتناب کرنے کی صلاح دی گئی ہے۔ اس کے علاوہ چلا اور غازی پور بارڈر کو بھی بند کر دیا گیا ہے۔ اس روٹ سے آنے والوں کو آنند وہار، ڈین این ڈی، اپسرا، بھوپورہ اور لونی بارڈر سے سفر کرنے کو کہا گیا ہے۔

کسان تنظیموں کے مابین چھ دور کے مذاکرات ہو چکے ہیں لیکن اتفاق رائے نہیں ہو پایا ہے۔ جمعہ کے روز سنگھ بارڈر پر 80 کسان تنظیموں کی میٹنگ ہونے جا رہی ہے۔ اس میٹنگ میں طے کیا جائے گاکہ چار جنوری کو ہونے جا رہی ساتویں دور کی بات چیت میں کسانوں کا کیا ایجنڈا رہے گا۔

اے آئی کے ایس ایس (آل انڈیا کسان سنگھرش کمیتی) کی ہریانہ کے سونی پت میں ہونے والی ایک میٹنگ میں 35 دن سے لگاتار سنگھو بارڈر پرجاری کسانوں کے احتجاج کو مضبوط بنانے کے حوالہ سے تبادلہ خیال کیا گیا۔ میٹنگ کے دوران فیصلہ لیا گیا ہے کہ 5 جنوری کو سنگھو بارڈر تک ایک ٹریکٹر مارچ نکالا جائے گا اور حکومت کے خلاف حتجاج کی صدا بلند کی جائے گی۔

راجستھان میں وزیر اعلیٰ اشوک گہلوت نے تمام وزار اور کانگریس پارٹی کے ارکان اسمبلی کو زرعی قوانین کے خلاف کسانوں کی حمایت میں اترنے کی ہدایت دی ہے۔ گزشتہ شام وزیر اعلیٰ کی رہائش گاہ پر وزرا کونسل کے طلب کئے گئے ایک اجلاس کے دوران یہ فیصلہ لیا گیا۔ آئندہ تین جنوری کو ریاستی کانگریس کمیٹی کی قیادت میں کانگریس کے تمام ارکان اسمبلی دھرنا دیں گے اور اس کے بعد یہ سبھی وزرا اور عہدیداران بشمول کارکنان 5 جنوری سے ایک ہفتہ تک گاؤں گاؤں میں گھوم کر کسان بچاؤ، ملک بچاؤ تحریک چلائیں گے۔

کیرالہ اسمبلی سے مرکز کے تین زرعی قوانین کے خلاف قرارداد کو منظور کر لیا گیا ہے۔ قرارداد میں کہا گیا ہے کہ کسانوں کے حقیقی خدشات کو سنا جانا چاہئے اور تینوں زرعی قوانین کو واپس لیا جانا چاہئے۔

دہلی کی سرحدوں پر جاری کسان تحریک کے درمیان اسمبلی میں خصوصی اجلاس کے دوران کیرالہ کے وزیر اعلیٰ پنرائی وجین نے مرکز کے زرعی قوانین کے خلاف قرارداد پیش کر دی ہے۔

وزیر اعلیٰ وجین نے کہا کہ موجودہ صورت حال سے صاف ہے کہ اگر کسان تحریک جاری رہتی ہے تو اس سے کیرالہ شدید طور پر متاثر ہوگا۔ انہوں نے کہا کہ اس میں کوئی شبہ نہیں ہے کہ اگر دیگر ریاستوں سے کھانے کی اشیا کی فراہمی بند ہو جائے تو کیرالہ بھوکا رہ جائے گا۔

مرکز کے تین زرعی اصلاحاتی قوانین کے خلاف کسانوں کی جانب سے چلائی جا رہی تحریک کے درمیان پنجاب میں بھارتیہ جنتا پارٹی (بی جےپی) کے رہنماؤں کی مخالفت تو پہلے سے ہی ہو رہی تھی لیکن اب ان کے لیے ’نو انٹری‘ بینر بھی لگنے لگے ہیں۔

پھگواڑا کے چک پریما گاؤں کے باہر اسی طرح کا بینر دیکھا گیا جس پر لکھا تھا، ’’گاؤں میں اسی کو داخل ہونے دیا جائے گا جو کسانوں کے ساتھ کھڑا ہے اور بی جے پی کے کسی رہنما کا گاؤں میں آنا منع ہے۔‘‘

دیہی عوام سے بات کرنے پر انہوں نے یو این آئی کو بتایا کہ مرکز کی مودی حکومت اپنی انا ترک کرنے کو تیار نہیں اور پنجاب کے بی جے پی رہنما کسانوں کا ساتھ دینے کے بجائے مودی حکومت کی وکالت کر رہے ہیں۔ انہوں نے واضح کیا کہ جب تک زرعی قوانین واپس نہیں لیے جاتے، یہ بائیکاٹ جاری رہے گا۔