کسان تحریک: کیرالہ اسمبلی میں زرعی قوانین پر بحث کیلئے اجلاس طلب کرنے کی ملی اجازت

کیرالہ کے گورنر عارف محمد خان نے تین زرعی قوانین پر بحث کرنے اور ان کے خلاف قرارداد پاس کرنے کے لیے 31 دسمبر کو ایک دن کے لیے اسمبلی کا خصوصی اجلاس مدعو کرنے کی اجازت دے دی۔ راج بھون ذرائع نے بتایا کہ گورنر نے خصوصی اجلاس کے لیے منظوری دے دی ہے۔ یہاں قابل ذکر ہے کہ کچھ دن قبل سی پی آئی قیادت والی ایل ڈی ایف حکومت نے اسمبلی اجلاس بلانے کی ایک تجویز بھیجی تھی جسے گورنر نے خارج کر دیا تھا۔ بعد ازاں ایک نئی تجویز بھیجی گئی جسے گورنر کی جانب سے منظوری مل گئی۔

مودی حکومت کے ذریعہ 30 دسمبر کو دوپہر 2 بجے مذاکرہ کی پیش کش کو کسان تنظیموں نے قبول کر لیا ہے۔ متنازعہ زرعی قوانین سے متعلق بات چیت کے لیے حامی بھرتے ہوئے مظاہرین کسان یونینوں نے کہا کہ وہ اگلے دور کی میٹنگ کے لیے تیار ہیں، لیکن مرکز کو اپنے دعوت نامے میں ایجنڈے کی وضاحت کرنی چاہیے تھی۔

این سی پی سربراہ شرد پوار اور سی پی آئی لیڈر سیتارام یچوری کے درمیان پیر کے روز ایک انتہائی اہم ملاقات ہوئی۔ جانکاری کے مطابق دونوں لیڈروں کے درمیان اس دوران کسان تحریک کو لے کر گفتگو ہوئی۔ شرد پوار نے اشارہ دیا ہے کہ 30 دسمبر تک اگر کوئی نتیجہ نہیں نکلا تو آگے کی پالیسی طے کریں گے۔

جاری کسان تحریک کے درمیان ایک طرف جہاں مودی حکومت نے آئندہ 30 دسمبر کو دوپہر 2 بجے کسانوں سے مذاکرہ کو ہری جھنڈی دے دی ہے، وہیں این سی پی سربراہ شرد پوار نے کہا ہے کہ ’’30 دسمبر کو حکومت اور کسانوں کی میٹنگ میں کیا ہوتا ہے وہ ہم دیکھیں گے۔ کوئی راستہ نکلا تو خوشی ہوگی، نہیں نکلا تو ہمیں بیٹھنا ہوگا اور سوچنا ہوگا۔‘‘

نئے زرعی قوانین کے خلاف مظاہرہ کر رہے کسانوں کے نمائندوں اور حکومت کے درمیان آئندہ میٹنگ 30 دسمبر کی دوپہر 2 بجے مقرر کی گئی ہے۔ مرکزی وزارت زراعت کے سکریٹری نے خط لکھ کر اس سلسلے میں کسان تنظیموں کو مطلع کیا ہے۔ میڈیا ذرائع سے موصول خبروں کے مطابق یہ میٹنگ دہلی واقع وگیان بھون میں ہوگی۔