’گھر چھوڑ کے جانے والے چابی ساتھ نہیں لے جاتے‘

ایک ایسے موقع پر جب بریگزٹ مذاکرات اپنے حتمی مراحل میں ہیں اور برطانیہ کے یورپی یونین سے اخراج میں چند ہی ماہ بچے ہیں، ٹمرمانز نے کہا کہ اس سلسلے میں یورپی شہریوں کے مفادات پر کوئی سمجھوتا نہیں کیا جائے گا۔ انہوں نے کہا کہ بریگزٹ مذاکرات میں مکمل کوشش کی جا رہی ہے کہ برطانوی اخراج کے نتیجے میں پہنچنے والے نقصان کو کم سے کم کیا جائے۔

ٹمرمانز نے کہا، ’’لیکن مجھے ایک بات واضح طور پر کہنے دیجیے۔ اگر کوئی یہ کہتا ہے کہ وہ آپ کے گھر سے جا رہا ہے، مگر چابی ساتھ لے جائے گا، تاکہ جس وقت چاہے واپس آ جائے اور گھر سے جو چاہے لے لے، تو ایسا ممکن نہیں۔‘‘

انہوں نے کہا کہ برطانیہ کے ساتھ جاری مذاکرات میں یورپی یونین کی رکن ریاست آئرلینڈ اور برطانوی صوبے شمالی آئرلینڈ کی سرحد اور چیکس پر کسی ڈیل میں یورپی شہریوں کے مفادات کے تحفظ کو یقینی بنانے کی کوشش کی جا رہی ہے۔

یہ بات اہم ہے کہ برطانیہ آئندہ برس مارچ میں یورپی یونین کی رکنیت چھوڑ دے گا، تاہم اب تک فریقین کے درمیان کوئی ڈیل طے نہیں پائی ہے، جس سے یہ واضح ہو کہ بریگزٹ کے بعد یورپی یونین اور برطانیہ کے درمیان تعلقات کس نوعیت کے ہوں گے۔ یورپی یونین اور برطانیہ کے درمیان سرحدی امور کے علاوہ، شہریوں کی نقل و حمل، فضائی ٹریفک، تجارت اور سلامتی سے متعدد امور پر ضوابط ابھی طے ہونا ہیں۔

اسی تناظر میں برطانیہ میں حکمران قدامت پسند جماعت کے اندر بھی اختلاف رائے پایا جاتا ہے۔ کچھ عرصے قبل بریگزٹ معاملے ہی کے تناظر میں وزارت خارجہ کا قلم دان چھوڑ دینے والے بورس جانسن اس حوالے سے برمنگھم میں پارٹی کی سالانہ کانفرنس سے خطاب کرنے والے ہیں، جس میں ممکنہ طور پر وہ وزیراعظم مے کے بریگزٹ منصوبے کو تنقید کا نشانہ بنائیں گے۔ جانسن اس سے قبل بھی یورپی یونین سے اخراج سے متعلق وزیراعظم مے کی پالیسی پر کڑی تنقید کر چکے ہیں۔