الیکشن کمیشن کی پریس کانفرنس سے جموں و کشمیر اور ہریانہ کے اسمبلی انتخابات کی تاریخوں کا اعلان، جانیں کب ہوگی ووٹنگ؟

جموں و کشمیر میں اسمبلی انتخابات 3 مراحل میں کرائے جائیں گے۔ پہلے مرحلہ کی ووٹنگ 18 ستمبر کو، دوسرے مرحلہ کی ووٹنگ 25 ستمبر کو جبکہ تیسرے اور آخری مرحلہ کی ووٹنگ یکم اکتوبر کو ہوگی۔ ہریانہ کی بات کریں تو وہاں کشمیر کے آخری مرحلہ والے دن یعنی یکم اکتوبر کو ووٹنگ ہوگی۔ جبکہ دونوں ریاستوں کے اسمبلی انتخابات کے ووٹوں کی گنتی ایک ہی دن 4 اکتوبر کو کی جائے گی اور اسی دن نتائج کا اعلان کیا جائے گا۔

چیف الیکشن کمشنر راجیو کمار کا کہنا ہے کہ ہریانہ میں دو کروڑ سے زیادہ ووٹر ہیں۔ 90 میں سے 73 سیٹیں جنرل ہیں۔ ہریانہ میں ووٹر لسٹ 27 اگست کو جاری کی جائے گی۔ ریاست میں 20 ہزار 269 پولنگ اسٹیشن قائم کیے جائیں گے۔

چیف الیکشن کمشنر راجیو کمار نے کہا کہ جموں و کشمیر کے لوگ تصویر بدلنا چاہتے ہیں۔ ہر کوئی الیکشن کے لیے بے تاب ہے۔ ہم موسم کے بہتر ہونے کا انتظار کر رہے تھے۔ امرناتھ یاترا کے ختم ہونے کا انتظار تھا۔ اس وقت جموں و کشمیر میں 87.09 لاکھ ووٹر ہیں۔ یہاں 20 لاکھ سے زیادہ نوجوان ہیں۔ حتمی ووٹر لسٹ 20 اگست کو جاری کی جائے گی۔

دہلی کے وگیان بھون میں الیکشن کمیشن کی پریس کانفرنس سے خطاب کرتے ہوئے چیف الیکشن کمشنر راجیو کمار نے جموں و کشمیر اور ہریانہ کے انتخابات کرائے جانے کا اعلان کر دیا۔ راجیو کمار نے بتایا کہ حال ہی میں الیکشن کمیشن کے عہدیداروں نے دونوں ریاستوں کا دورہ کیا تھا اور وہاں کے لوگوں میں الیکشن کے حوالہ سے کافی جوش و خروش ہے۔