پاکستانی اقوام متحدہ مشن پر سائبر حملہ، اکاؤنٹ، ای میل، یوٹیوب چینل میں لگائی گئی سیندھ

اقوا متحدہ میں پاکستان کے مستقل مشن پر سائبر حملہ کیا گیا ہے جس میں اس کے آفیشیل ای میل اکاؤنٹ اور یوٹیوب چینل میں سیندھ لگائی گئی ہے۔ ہفتہ کے روز ایک رپورٹ میں اس تعلق سے جانکاری دی گئی۔ انگریزی اخبار ’دی ٹریبیون‘ کی خبر کے مطابق یہ سائبر حملہ جمعہ کو امریکی وقت کے مطابق شام 4 بجے ہوا۔

اس رپورٹ میں یہ بھی بتایا گیا ہے کہ سائبر حملہ کا ہدف اقوام متحدہ میں پاکستان کے مستقل مشن کے نیوز سیل کے ذریعہ استعمال کیا جانے والا ای میل آئی ڈی تھا۔ خبر میں ذرائع کے حوالے سے کہا گیا ہے کہ مشن کے یوٹیوب چینل میں سیندھ لگائی گئی اور حملہ آوروں نے اس کا نام، بینر اور مواد بدل دیا۔

اس درمیان پاکستانی اقوام متحدہ مشن نے گزارش کی ہے کہ اس کے چینلوں پر ڈالے گئے سبھی ای میل اور ویڈیو کو تب تک نظر انداز کیا جائے جب تک کہ وہ اپنے اکاؤنٹ پر کنٹرول حاصل نہیں کر لیتے۔ قابل ذکر ہے کہ کسی بھی گروپ یا ادارہ نے اس سائبر حملے کی فی الحال ذمہ داری قبول نہیں کی ہے۔