دہلی: درخت کو بچانے کے لیے کانگریس خواتین نے سبز لباس پہن کر کیا مظاہرہ

ایک طرف دہلی ہائی کورٹ نے ملک کی راجدھانی دہلی کی از سر نو تعمیر کے نام پر 16500 درختوں کو کاٹنے پر 4 جولائی تک کے لیے روک لگا دی ہے اور دوسری طرف مختلف تنظیموں اور اداروں کے ذریعہ مرکزی حکومت کے ذریعہ درختوں کو کاٹنے کی منظور دیے جانے پر ناراضگی کا اظہار بھی کیا جا رہا ہے۔ سروجنی نگر، قدوائی نگر، نیتا جی نگر اور نوروجی نگر وغیرہ میں لگاتار درختوں کو بچانے کے لیے مظاہرے ہو رہے ہیں۔ آج کانگریس کی خاتون کارکنان پر مبنی ’گرین بریگیڈ‘ نے بھی سروجنی نگر میں سبز لباس زیب تن کر کے مظاہرہ کیا اور ہاتھوں میں تختی لے کر درخت کو بچانے کی اپیل کی۔

خاتون کانگریس کارکنان کے ذریعہ کیے گئے اس مظاہرہ میں پرنب مکھرجی کی بیٹی اور کانگریس لیڈر سرمشٹھا مکھرجی بھی موجود تھیں اور انھوں نے ’مجھے بچاو‘ لکھے ہوئے پوسٹر کو درختوں پر لگا کر مظاہرہ کیا۔ اس مظاہرہ کے دوران سبز رنگ کی ساڑیوں اور شلوار سوٹ میں خواتین یہ ظاہر کرنے کی کوشش کر رہی تھیں کہ دہلی میں ہریالی کی ضرورت ہے اور درختوں کے کاٹنے سے اس کا برا اثر ماحولیات پر پڑے گا۔ یہ خواتین جو تختیاں لیے ہوئی تھیں اس پر ’پیڑ پودے مت کرو نشٹ، سانس لینے میں ہوگا کشٹ‘، ’سیو دی اَرتھ، وانٹ اے ٹری‘ اور ’مجھے بچاؤ‘ جیسے سلوگن لکھے ہوئے تھے۔ سروجنی نگر میں کیے گئے اس مظاہرے کی تصویری جھلکیاں نیچے دیکھی جا سکتی ہیں۔