پی ایم مودی بدعنوان ہیں، ملک انھیں نہیں بخشنے والا: راہل گاندھی

سی بی آئی معاملے میں مودی حکومت کی کارروائی پر کانگریس صدر راہل گاندھی نے مودی حکومت پر حملہ تیز تر کر دیا ہے۔ انھوں نے آج پریس کانفرنس کر کے کہا کہ سی بی آئی ڈائریکٹر کو ہٹانا ہندوستانی آئین کی بے عزتی ہے، سی جے آئی کی بے عزتی ہے اور ہندوستانی عوام کی بھی بے عزتی ہے۔

انھوں نے واضح لفظوں میں کہا کہ سی بی آئی ڈائریکٹر کی تقرری اور ہٹانے میں پی ایم اپنی مرضی نہیں چلا سکتے۔ قانون کے مطابق سپریم کورٹ کے چیف جسٹس، اپوزیشن لیڈر اور وزیر اعظم کی کمیٹی یہ طے کرتی ہے۔ اس لیے سی بی آئی ڈائریکٹر کو ہٹانا غیر قانونی ہے۔ راہل گاندھی نے 23 اور 24 اکتوبر کی نصف شب کو سی بی آئی ڈائریکٹر کو ہٹائے جانے پر کہا کہ ایسا اس لیے کیا گیا کیونکہ وہ رافیل گھوٹالہ کی جانچ کرنے والے تھے۔

راہل گاندھی نے پریس کانفرنس کے دوران یہ بھی کہا کہ سی بی آئی ڈائریکٹر کو رات کو دو بجے ہٹانے کا مقصد رافیل سے جڑے دستاویزات کو بھی باہر آنے سے روکنا تھا۔ وزیر اعظم صرف سی بی آئی ڈائریکٹر کو ہٹا نہیں رہے ہیں بلکہ ثبوتوں کو مٹانے کا کام بھی کر رہے ہیں۔ راہل گاندھی نے کہا کہ ’’اگر سی بی آئی جانچ شروع ہو جاتی تو دودھ کا دودھ اور پانی کا پانی ہو جاتا۔ اس سے گھبرا کر، خوف کے سبب وزیر اعظم نے سی بی آئی ڈائریکٹر کو ہٹا دیا۔‘‘

کانگریس صدر نے وزیر اعظم نریندر مودی پر براہ راست الزام عائد کرتے ہوئے کہا کہ پی ایم نے رافیل میں 30 ہزار کروڑ کی بدعنوانی کی ہے۔ حکومت نے 30 ہزار کروڑ روپے انل امبانی کے پاکیٹ میں ڈال دیے۔ کانگریس پارٹی اس کی سچائی کو عوام کے سامنے ضروری لائے گی۔ انھوں نے زور دے کر کہا کہ ’’پورا ملک جانتا ہے کہ وزیر اعظم نے بدعنوانی کی ہے۔ وزیر اعظم جانتے ہیں کہ اگر رافیل کی جانچ شروع ہو گئی تو وہ ختم ہو جائیں گے اور یہی ان کی گھبراہٹ ہے۔ لیکن یہ ملک وزیر اعظم کو ان کی بدعنوانی کو بھولنے نہیں دے گا۔ یہ ملک وزیر اعظم کو نہیں بخشنے والا۔‘‘

راہل گاندھی نے سی بی آئی کے نئے ڈائریکٹر ناگیشور راؤ سے متعلق کہا کہ وزیر اعظم نے ایک ایسے افسر کو سی بی آئی ڈائریکٹر کی ذمہ داری دے دی ہے جن پر پہلے سے ہی بدعنوانی کے الزامات ہیں۔ انھوں نے ایسا اس لیے کیا کیونکہ نئے ڈائریکٹر حکومت کے مفاد کے خلاف کام نہ کریں۔