بنگلہ دیش بحران: ہندوستان نے اٹھایا بڑا قدم، ہائی کمیشن اور قونصلیٹ کے غیر ضروری ملازمین کو واپس بلایا

بنگلہ دیش میں جاری تشدد اور سیاسی بحران کے درمیان ہندوستان نے وہاں اپنے ہائی کمیشن اور قونصلیٹ میں تعینات غیر ضروری ملازمین کو واپس بلانے کا ایک اہم فیصلہ کیا ہے۔ جس کے بعد ڈھاکہ میں ہائی کمیشن اور قونصلیٹ میں تعینات غیر ضروری ملازمین اور ان کے کنبہ کی واپسی کمرشیل اڑان کے ذریعہ ہوئی ہے۔ واپس آئے سبھی سفارت کار فی الھال ہائی کمیشن میں ہی رہیں گے۔ حالانکہ ذرائع نے بتایا ہے کہ بنگہ دیش میں ہندوستانی ہائی کمیشن میں کام جاری رہے گا۔

بنگلہ دیش میں پھنسے ہندوستانیوں کو واپس لانے کے لیے ایئر انڈیا اور انڈیگو نے ڈھاکہ کے لیے خصوصی پروازیں چلائی ہیں۔ اس کے ذریعہ فی الحال 400 سے زیادہ لوگوں کو ہندوستان لایا گیا ہے۔ ایک افسر کے مطابق ایئر انڈیا کی خصوصی پرواز سے بدھ کی صبح 6 بچوں سمیت 205 لوگوں کی وطن واپسی ہوئی۔ ادھر انڈیگو نے اپنے ایک بیان میں کہا ہے کہ ڈھاکہ ہوائی اڈے کے غیر مستقل طور پر بند ہونے کے بعد انڈیگو نے 6 اگست 2024 کو ڈھاکہ سے کولکاتہ کے لیے خصوصی پرواز شروع کی گئی ہے۔ یہ اڑان بنگلہ دیش سے ہندوستانی شہریوں کو بحفاظت واپس لانے کے لیے شروع کی گئی ہیں۔ ایئر لائن کے مطابق ہندوستان سے ڈھاکہ کے درمیان بدھ سے پروازوں کا سلسلہ شروع ہوگا۔

 ایئر انڈیا نے بھی دہلی سے ڈھاکہ کے درمیان اپنی روزانہ کی 2 پروازوں کو شروع کر دیا ہے۔ وِستارا بھی بدھ سے طے وقت کے مطابق ڈھاکہ کے لیے اپنی پروازیں شروع کر رہی ہے۔ واضح ہو کہ بنگلہ دیش میں سرکاری ملازمت میں کچھ خاص لوگوں کے ایک طبقہ کے لیے ریزرویشن نظام کے خلاف جولائی کے وسط سے طلبا کا زبردست مظاہرہ شروع ہو گیا تھا جس نے تشدد کی شکل اختیار کرلی ہے۔ اس میں اب تک سینکڑوں لوگوں کی جانیں تلف ہوچکی ہیں۔ ملک میں تختہ پلٹ ہوچکا ہے اور وزیراعظم شیخ حسینہ استعفیٰ دے کر ملک چھوڑ چکی ہیں۔