حادثہ کے شکار مراج تربیتی طیارہ کے دونوں پائلٹ کی موت

نئی دہلی: فضائیہ کا ایک تربیتی مراج 2000طیارہ بنگلور کے ہندستان ایروناٹکس لمیٹڈ (ایچ اے ایل) ہوائی اڈہ پر آج حادثہ کا شکار ہوگیا۔ حادثہ میں ایک پائلٹ کا انتقال جائے وقوع پر ہی ہو گیا تھا جب کہ دوسرے پائلٹ کو سنگین طور پر زخمی حالت میں اسپتال میں داخل کیا گیا تھا۔ بعد ازاں زخموں کی تاب نہ لانے کے سبب دوسرے پائلٹ کا بھی انتقال ہو گیا۔

میڈیا ذرائع کا کہنا ہے کہ ایچ اے ایل نے حال ہی میں اس طیارہ کو اَپ گریڈ کیا تھااور اس کی تربیتی پرواز چل رہی تھی۔ آج صبح ساڑھے دس بجے اس طیارہ نے ایچ اے ایل کی ہوائی پٹی سے پرواز کی لیکن اس کے بعد اس میں کچھ خرابی آگئی۔ حادثہ کے بعد طیارہ میں سوار دونوں پائلٹوں نے پیراشوٹ کی مدد سے چھلانگ لگائی لیکن دونوں ہی اپنی زندگی بچانے میں ناکام ہو گئے۔

موصولہ خبروں میں کہا جارہا ہے کہ ایک پائلٹ کی موت حادثہ کا شکار طیارہ کے ملبہ پر اترنے کی وجہ سے ہوئی ہے۔ حالانکہ ابھی اس کی تصدیق نہیں ہوئی ہے۔ حادثے کی تفصیلات کا انتظار کیا جارہا ہے۔ حادثہ کے اسباب کا پتہ لگانے کے لئے جانچ کی ہدایت بھی دے دی گئی ہے۔ قابل ذکر ہے کہ اس سے پہلے 2012میں بھی دو مراج طیارے حادثہ کا شکار ہوئے تھے۔

(یو این آئی ان پٹ کے ساتھ)