کورونا وائرس: پاکستان میں مرنے والوں کی عمریں کیا ہیں؟

پاکستان کی وفاقی اور صوبائی حکومتوں نے گزشتہ روز سے جزوی لاک ڈاؤن میں دو ہفتوں کے لیے توسیع کا فیصلہ کیا۔ تاہم لاک ڈاؤن میں مزید نرمی کرتے ہوئے ملک بھر میں تعمیراتی شعبے سمیت کئی دیگر کاروبار بھی کھولنے کی اجازت دے دی گئی۔

پاکستان میں کورونا وائرس کی صورت حال

پاکستانی حکومت نے ملک میں کورونا وائرس سے متعلق تازہ ترین اعداد و شمار کے لیے خصوصی ویب سائٹ ترتیب دے رکھی ہے۔

کل پندرہ اپریل کی صبح تک کے اعداد و شمار کے مطابق پاکستان بھر میں 5,988 افراد کورونا وائرس سے متاثر ہو چکے ہیں۔

کووِڈ انیس سے متاثر ہونے والے افراد میں سے اب تک 1,446 مریض دوبارہ صحت مند ہو چکے ہیں جب کہ 107 افراد کے لیے یہ مرض جان لیوا ثابت ہوا۔ اس وقت پاکستان میں 'ایکٹیو کیسز‘ کی تعداد 4,435 ہے۔

سب سے زیادہ متاثر ہونے والے صوبے اور شہر

آبادی کے اعتبار سے سب سے بڑے پاکستانی صوبے پنجاب مریضوں کی تعداد بھی سب سے زیادہ ہے۔ پنجاب میں قریب تین ہزار جب کہ سندھ میں ڈیڑھ ہزار سے زائد افراد میں کورونا وائرس کی تشخیص ہو چکی ہے۔

صوبہ خیبر پختونخوا میں مریضوں کی تعداد 865 ہے لیکن ہلاکتوں کی تعداد سب سے زیادہ یعنی 38 ہے۔ بلوچستان میں 240 افراد کورونا وائرس سے متاثر ہوئے جن میں سے دو افراد ہلاک ہوئے ہیں۔

مریضوں کی سب سے کم تعداد پاکستان کے مقبوضہ کشمیر میں ہے، جہاں متاثرہ افراد کی تعداد 46 ہے جن میں سے چار افراد صحت یاب ہوئے ہیں جب کہ ہلاکتوں کی تعداد صفر ہے۔

سب سے زیادہ متاثر ہونے والے شہروں میں نمایاں ترین لاہور اور کراچی ہیں۔ لاہور میں مریضوں کی تعداد ملک بھر کے مجموعی کیسز کا بیس فیصد سے زائد ہے۔ قریب اٹھارہ فیصد مریض کراچی میں ہیں۔ دیگر متاثرہ شہروں میں حیدر آباد، ڈیرہ غازی خان، گجرات، ملتان، راولپنڈی اور گوجرانوالہ شامل ہیں۔

مریضوں میں زیادہ تر مرد ہیں

اعداد و شمار کے مطابق پاکستان میں کورونا وائرس سے متاثر ہونے والوں میں ایک چوتھائی تعداد خواتین کی ہے جب کہ 75 فیصد کے قریب متاثر افراد مرد ہیں۔ خواتین مریضوں میں سے قریب چوبیس فیصد کا تعلق کراچی سے ہے جب کہ لاہور میں موجود مریضوں میں سے قریب بارہ فیصد خواتین ہیں۔ مردوں اور خواتین میں سے قریب بیالیس فیصد مریضوں کی عمریں تیس برس یا اس سے کم ہیں۔

پاکستان میں مرنے والوں کی عمریں کیا تھیں؟

پاکستان میں مجموعی طور پر اب تک ایک سو سات افراد ہلاک ہو چکے ہیں۔ خیبر پختونخوا میں 38، سندھ میں 35، پنجاب میں 28 جب کہ بلوچستان میں دو افراد ہلاک ہوئے۔

ہلاک ہونے والے مریضوں میں بائیس فیصد خواتین ہیں جب کہ دیگر اٹھہتر فیصد مرد ہیں۔ کووِڈ انیس میں مبتلا ہو کر ہلاک ہونے والے مرد و خواتین میں 31 فیصد سے زائد کی عمریں ساٹھ سے انہتر برس کے درمیان ہیں۔

مجموعی طور پر ہلاک ہونے والے پاکستانی مرد و خواتین میں سے 80 فیصد سے زائد کی عمریں پچاس برس یا اس سے زیادہ ہے۔ مرنے والی خواتین میں سے نصف سے زائد کی عمر ساٹھ اور ستر برس کے مابین تھی۔ قریب اٹھارہ فیصد کی عمریں پچاس اور ساٹھ برس کے درمیان تھیں۔ قریب سترہ فیصد خواتین کی عمریں بیس اور چالیس برس کے درمیان تھیں۔