چین کے لیے جاسوسی کرنے کے شبہ میں پکڑے گئے کبوتر کو 8 ماہ بعد ملی آزادی

ممبئی میں ایک قیدی کبوتر کو آٹھ ماہ بعد آزادی کی ہوا میں سانس لینے کا موقع ملا۔ اس کبوتر کو چین کے لیے جاسوسی کرنے کے شبہ میں پکڑا گیا تھا، لیکن منگل کے روز اسے آزاد کر دیا گیا۔ ایک پولیس نے افسر نے بدھ کو اس سلسلے میں جانکاری دیتے ہوئے بتایا کہ پریل علاقے کے سکربائی دنشا پیٹٹ اسپتال نے پیر کو پولیس سے پرندہ کو رِہا کرنے کی اجازت مانگی، جس کے بعد منگل کو اسے آزاد کر دیا گیا۔

نیشنل کیمیکل اینڈ فرٹیلائزر پولیس (آر سی ایف) نے کبوتر کو گزشتہ سال مئی میں چیمبور کے پیر پاؤ جیٹی سے پکڑا تھا۔ پولیس کے مطابق اس کبوتر کے پیر میں دو چھلّے تھے۔ ایک تانبے کا چھلّا تھا جبکہ دوسرا ایلومنیم کا تھا۔ اس کے پنکھوں کے نیچے چینی زبان میں کچھ پیغام لکھا ہوا تھا۔ اسی وجہ سے کبوتر پر چینی جاسوس ہونے کا شبہ کیا گیا۔

آر سی ایف پولیس نے کبوتر کو پکڑ کر اس تعلق سے معاملہ درج کر لیا تھا۔ لیکن جانچ مکمل ہونے کے بعد جاسوسی کا الزام ہٹا لیا گیا ہے۔ افسر نے کہا کہ پولیس کو معاملے کی تحقیقات کے دوران پتہ چلا کہ یہ کبوتر تائیوان میں ایک تقریب کے دوران کھلے پانی میں دوڑ لگا رہا تھا۔ اسی دوران وہ اڑ کر تائپے سے ممبئی پہنچ گیا۔ انھوں نے یہ بھی بتایا کہ پولیس نے کبوتر کو چھوڑنے کی اجازت دی، جس کے بعد اسپتال نے اسے آزاد کر دیا۔