کئی ریاستوں میں آندھی کا قہر،60 سے زیادہ لوگوں کی موت، آج کے لئے بھی ایلرٹ

ٹی وی رپورٹس کے مطابق اتوار کو دہلی اور ملک کی کئی ریاستوں میں آئے زبردست آندھی طوفان میں اب تک 60 سے زیادہ لوگوں کے مرنے کی خبر ہے اور 80 سے زیادہ لوگوں کے زخمی ہونے کی خبر ہے۔ اکیلے اتر پردیش سے18 لوگوں کے مرنے کی خبر ہے جبکہ دہلی سے دو لوگوں کے مرنے کی خبر ہے۔

اس زبردست آندھی طوفان سے دہلی میں جہاں ٹریفک کا پورا نظام درہم برہم ہو گیا وہیں کئی جگہ پر پیڑ گرنے سے لوگوں کو کئی طرح کے نقصان جھیلنے پڑے۔ کئی گھنٹے جہاں میٹرو کا سفر متاثر رہا وہیں ہوائی اڈے سے کئی پروازوں کو روکنا پڑا اور اترنے والی کئی پروازوں کو ڈائیورٹ کرنا پڑا۔ آندھرا پردیش، تلنگانا اور مغربی بنگال میں بجلی گرنے سے 18 سے زیادہ لوگوں کی موت ہو گئی۔

ادھر اس آندھی سے ہونے والی اموات پر وزیر اعظم اور کانگریس صدر راہل گاندھی نے غم اور دکھ کا اظہار کرتے ہوئے متاثرہ خاندان کے افراد کے لئے ہر ممکن مدد کا یقین دلایا ہے۔

واضح رہے محکمہ موسمیات کی جانب سے آج یعنی پیر کے لئے بھی ایلرٹ جاری کیا گیا ہے۔ محکمہ موسمیات کے سائنسداں چرن سنگھ نے بتایا ہے کہ ’’آندھی طوفان کا دور اگلے 48 سے 72 گھنٹے تک جاری رہے گا‘‘