’اسپتال کی جگہ شمشان کی صلاحیت بڑھا رہی یوگی حکومت‘

کانگریس جنرل سکریٹری پرینکا گاندھی نے اپنے ایک بیان میں کہا ہے کہ اتر پردیش حکومت نہ صرف کورونا سے متعلق اعداد و شمار کے ساتھ کھلواڑ کر رہی ہے، بلکہ لوگوں کی زندگی کے ساتھ بھی کھیل رہی ہے۔ بدھ کے روز پارٹی لیڈروں کے ساتھ ایک میٹنگ کو خطاب کرتے ہوئے پرینکا گاندھی نے کہا کہ ریاست میں حالات دھماکہ خیز ہو گئے ہیں جس پر توجہ دینے کی ضرورت ہے۔

پرینکا گاندھی نے مزید کہا کہ حکومت غیر انسانی طریقے سے لوگوں کے ساتھ سلوک کر رہی ہے اور اسپتالوں کی صلاحیت بڑھانے کی جگہ وہ شمشان کی صلاحیت بڑھا رہی ہے۔ اپوزیشن پارٹی کے طور پر کانگریس کی یہ ذمہ داری ہے کہ وہ لوگوں کی لڑائی لڑے اور جو بھی ہو سکے ان کی مدد کرے۔

اس سے قبل پرینکا گاندھی نے اتر پردیش کے وزیر اعلیٰ یوگی آدتیہ ناتھ اور سابق وزیر اعلیٰ اکھلیش یادو کے کورونا پازیٹو ہونے کی جانکاری ملنے پر ٹوئٹ کیا اور دونوں کے جلد صحت یاب ہونے کے لیے دعاء کی۔ انھوں نے ٹوئٹ میں لکھا کہ ’’آپ دونوں کے کورونا انفیکشن کے شکار ہونے کی خبر ملی۔ ایشور سے دعا ہے کہ آپ محفوظ رہیں اور جلد صحت حاصل کریں۔‘‘

بہر حال، آج ہوئی میٹنگ میں پارٹی کے سبھی ڈویژنل چیف، سابق اراکین پارلیمنٹ، اراکین اسمبلی اور سینئر عہدیداران موجود تھے۔ پرینکا گاندھی اپنے شوہر رابرٹ واڈرا کے کورونا پازیٹو ہونے کے بعد سے اب تک ہوم آئسولیشن میں ہیں۔ وہ ورچوئل طریقے سے ہی پارٹی لیڈران اور کارکنان کے ساتھ میٹنگ کر رہی ہیں۔