کورونا سے لڑنے کے لئے یوگی حکومت کی کوششیں ناکافی: اکھلیش

کورونا وائرس کے خطرات سے نبردآزما ہونے کے لئے یوپی کی یوگی حکومت کی کوشش کو ناکافی بتاتے ہوئے سماج وادی پارٹی(ایس پی) سربراہ اکھلیش یادو نے کسانوں اور غریبوں کی مدد کے لئے ریونیو وصولی روکنے اور بینک قرضوں پر سود کی معافی سمیت دیگر کئی تجاویز پیش کئ ہیں۔

یادو نے کہا کہ کورونا وباکی وجہ سے اس وقت کسانوں کو مالی بحران کا سامنا ہے۔ اس مصیبت میں پھنسے لوگوں سے سبھی ریونیو وصولی روکے جائیں ،بینک قرضوں پر سود کو معاف کیا جائے۔کورونا کے خطرات سرکاری اور غیر سرکاری کوششوں کے باوجود رک نہیں رہا ہے۔

انہوں نے کہا کہ اس ضمن عوام کو بیدار کرنے میں میڈیکل اہلکار،میڈیا نمائندوں ، سماجی تنظیموں اور ضروری خدمات سے منسلک دیگر محکموں کے ملازمین صحیح ڈھنگ سے اپنی ذمہ داریوں کو اداکررہے ہیں لیکن اچانک لاک ڈاؤن سے کچھ مسائل بھی پیدا ہوئے ہیں جن کی جانب ابھی حکومت مناسب دھیان نہیں دے رہی ہے۔

انہوں نے کہا کہ حکومت کے بڑے بڑے دعوے تو کررہی ہے لیکن حقیقت میں کوئی انتظام نہیں کیا گیا ہے۔ گونڈہ ،بلرامپور، پریاگ راج سمیت کئی اضلاع میں قرنطینہ مراکز بدحالی کا شکار ہیں۔ جن لیکھ پالوں کے ذمہ کھانے اور ادویہ پہنچانے کی ذمہ داری ہے وہ موقع سے غائب ہیں۔ سابق وزیر اعلی نے سوال کیا کہ بدنظمی کے اس عالم میں کورونا سے جنگ کیسے جیتی جائے گی۔

ایس پی سربراہ نے کہا کہ بی جے پی کے اقتدار میں آنے کے بعد کسانوں کے مشکلات کا دور شروع ہوا ہے جو رکنے کا نام نہیں لے رہا ہے۔کسانوں کے پیداوار منڈی تک پہنچنے کا انتظام نہیں ہے۔ پھل ،سبزی کی مناسب قیمت نہیں مل رہی ہے۔ کھیتوں میں کھڑی فصل کے کاٹنے کا انتظام نہیں ہے۔گنا کسانوں کے بقایاجات کی مکمل ادائیگی فوراکرائی جائے۔ کسان سمان رقم بند ہے اسے فورا شروع کیا جائے۔

یادو نے کہا کہ جن غریبوں کے پاس کارڈ نہیں ان کو بھی راشن کے ساتھ ہزار روپئے کی مالی مدد دی جائے۔ طلبا۔طالبات کی فیس معاف کی جائے اور غریب خواتین کے لئے سماج وادی پنشن کی فورا ادائیگی کی جائے۔