یدی یورپا پر ایم ایل اے کی خرید و فروخت کا الزام، ہائی کورٹ نے دیا تحقیقات کا حکم

نئی دہلی: کانگریس نے کہا ہے کہ گھپلے کے الزام سے گھرے کرناٹک کے وزیراعلیٰ بی ایس یدی یورپا کے خلاف ایم ایل اے خریدوفروخت معاملے میں ہائی کورٹ نے تحقیقات کرنے کا حکم دیا ہے اس لئے منصفانہ تحقیقات کے لئے انہیں فوری طور پر ہٹایا جانا چاہیے۔

کانگریس کے ترجمان راجیوشکلا نے جمعرات کو یہاں پریس کانفرنس میں کہا کہ آپریشن کمل کے تحت کرناٹک میں اراکین اسمبلی کی خریدوفروخت کے معاملے کی تحقیقات کے تعلق سے ہائی کورٹ نے بدھ کو اسٹے ہٹانے اور اس معاملے کی تحقیقات کرنے کے احکام دیئے ہیں۔

انہوں نے کہا کہ یدی یورپا نے اراکین اسمبلی کی خریدوفروخت کر کے غیرقانونی طریقے سے حکومت بنائی تھی۔ انہوں نے بدعنوان ذرائع کے استعمال سے حکومت تشکیل دی تھی اور اس معاملے کی تحقیقات سے متعلق تمام رکاوٹیں دور کرکے عدالت نے معاملے کی جانچ کے حکم دیئے ہیں، اس لئے وزیر اعلیٰ کو استعفیٰ دینا چاہیے یا انہیں ہٹایا جانا چاہیے۔ ان کا کہنا تھا کہ یدی یورپا کے عہدے پر رہتے ہوئے منصفانہ تحقیقات نہیں ہوسکتی ہے۔

کانگریس لیڈر نے کہا کہ موجودہ کرناٹک حکومت کے ایک وزیر نے الزام لگایا ہے کہ وزیر اعلیٰ ان کی وزارت سے متعلق معاملات میں براہ راست مداخلت پر کروڑوں روپے لوگوں کو تقسیم کر رہے ہیں۔ انہوں نے اسے بڑا گھپلہ بتایا اور کہا کہ یدی یورپا پر بدعنوانی کے کئی معاملات ہیں، اس لئے انہیں عہدے سے ہٹاکر ان معاملات کی تحقیقات کی جانی چاہیے۔