بی جے پی رکن اسمبلی پر ریپ کا الزام، متاثرہ کی سی ایم ہاؤس پر خودکشی کی کوشش

اتوار کی صبح لکھنؤ میں وزیر اعلی یوگی آدتیہ ناتھ کی رہائش گاہ کے باہر اس وقت گہما گہمی کا ماحول پیدا ہو گیا جب ایک خاتون اور اس کے اہلخانہ وہاں خودکشی کی کوشش کی۔ خاتون کا کہنا ہے کہ بی جے پی کے رکن اسمبلی اور اور اس کے ساتھیوں نے اس کی عصمت دری کی ہے۔ خاتون کا الزام ہے کہ اس نے پولس سے لے کر افسران تک اپنی تکلیف بیان کی ہے لیکن کہیں بھی کوئی سنوائی نہیں ہو رہی۔ خاتون کا کہنا ہے کہ اب اس کے سامنے کوئی چارہ نہیں بچا ہے۔

میڈیا رپورٹوں کے مطابق خاتون اپنے خاندان کے افراد کے ساتھ وزیراعلی کی رہائش کے باہر کھڑی ہو گئی۔ اس کے بعد انہوں نے خاندان کے افراد کے ساتھ خودکشی کی کوشش کی۔ خاتون کو جب ایسا کرنے سے روکا گیا تو اس نے بتایا کہ بی جے پی کے رکن اسمبلی نے ان کے ساتھ عصمت دری کی ہے۔

خاتون کا کہنا ہے کہ اب اسے دھمکیاں دی جا رہی ہیں۔ اس نے کہا کہ اگر رکن اسمبلی کو گرفتار نہیں کیا گیا تو وہ اپنی جان دے دیگی۔