’ہاتھ بدلے گا حالات‘ نعرے کے ساتھ جاری ہوا کانگریس کا ’نیائے پتر‘، غریبوں کی خوشحالی کا وعدہ

نئی دہلی: کانگریس نے آج 2024 کے انتخابات کے لیے ’ہاتھ بدلے گا حالت‘ کے نعرے کے ساتھ اپنا منشور جاری کیا اور کہا کہ یہ ’نیائے پتر‘ ہے جو ملک کے لوگوں کو پانچ نیائے (انصاف) کے ساتھ 25 گارنٹیاں دیتا ہے۔ اور غریبوں کی خوشحالی کا وعدہ کرتا ہے۔

کانگریس صدر ملکارجن کھڑگے، پارلیمانی پارٹی کی لیڈر سونیا گاندھی، پارٹی کے سابق صدر راہل گاندھی، منشور کمیٹی کے چیئرمین پی چدمبرم اور پارٹی کے جنرل سکریٹری تنظیم کے سی وینوگوپال نے جمعہ کو یہاں پارٹی ہیڈکوارٹر میں مشترکہ طور پر کانگریس کا منشور جاری کرتے ہوئے کہا کہ منشور انصاف کی گارنٹی دیتا ہے، اس لیے اسے ’نیائے پتر‘ کہا گیا ہے۔ اس میں تمام اہل وطنوں سے انصاف کا وعدہ کیا گیا ہے اور لوگوں کو یقین دلایا گیا ہے کہ کانگریس کو ووٹ دینے سے پورے ملک کے حالات بدل جائیں گے۔

کھڑگے نے کہا کہ منشور غریبوں کے لیے وقف ہے اور ملک کے غریبوں کو عزت دینے کا وعدہ کرتا ہے۔ اس میں عام لوگوں کی معاشی حالت کو بہتر بنانے کے لیے 5000 کروڑ روپے کے نئے اسٹارٹ اپ فنڈ کا بھی وعدہ کیا گیا ہے۔

انہوں نے کہا کہ ہم ملک کی سماجی اور اقتصادی رفتار کو آگے لے کر جائیں گے۔ کسانوں، غریبوں، مزدوروں، خواتین اور محروم طبقات کے لیے ترقی کے بند دروازے کھولیں گے۔ یہ ہمارا عہد ہے۔ وزیر اعظم نریندر مودی ہمیشہ ڈاکٹر منموہن سنگھ کی قیادت والی حکومت پر تنقید کرتے ہیں، لیکن ان 10 سالوں میں کانگریس نے منریگا، حق اطلاعات، فوڈ سیکورٹی، اراضی حصول قانون، تعلیم کا حق سمیت کئی اقدامات اٹھائے ہیں۔ محترمہ سونیا گاندھی کا منریگا اور فوڈ سیکورٹی کے پیچھے بہت بڑا تعاون کیا ہے۔ مودی جی اپنے 10 سال کے دور اقتدار میں اس کے مقابلے میں ایک بھی کام نہیں کر سکے۔‘‘

پارٹی لیڈر راہل گاندھی نے کہا کہ بھارت جوڑو یاترا اور بھارت جوڑو نیائے یاترا کے دوران انہوں نے ملک کی حالت کو قریب سے دیکھا ہے اور وہ جانتے ہیں کہ ملک کے لوگوں کے ساتھ انصاف نہیں ہو رہا ہے، اس لئے کانگریس پارٹی ملک کے عوام کو 25 گارنٹیاں دے رہی ہے۔ انہوں نے کہا کہ یہ الیکشن ان لوگوں کے درمیان ہو رہا ہے جو جمہوریت اور آئین کو بچانا چاہتے ہیں اور جو اسے تباہ کرنا چاہتے ہیں، اس لیے لوگوں کو آئین اور جمہوریت کو بچانے کے لیے کانگریس کو ووٹ دینا ہے۔ انہوں نے یہ بھی کہا کہ یہ کانگریس اور بی جے پی کے درمیان سخت انتخابی جنگ ہے اور کانگریس پوری طاقت سے لڑے گی اور یہ الیکشن جیتے گی۔

راہل گاندھی نے کہا کہ یہ انتخاب ان لوگوں کو ہٹانے کے لیے ہے جو ملک کے آئین اور جمہوریت کو تباہ کرنا چاہتے ہیں۔ یہ الیکشن جمہوریت اور آئین کو بچانے کا الیکشن ہے۔ انہوں نے کہا کہ ایک طرف مودی اور نیشنل ڈیموکریٹک الائنس جمہوریت اور آئین پر حملہ کر رہے ہیں تو دوسری طرف انڈیا گروپ جمہوریت اور آئین کی حفاظت کر رہا ہے۔ یہ الیکشن ان دو طاقتوں کے درمیان ہے۔

کانگریس لیڈر نے کہا کہ یہ انتخاب آئین اور جمہوریت کو تباہ کرنے والوں اور جمہوریت اور آئین کو بچانے والوں کے درمیان ہے۔ انہوں نے کہا کہ اگر کانگریس انتخابات جیتی ہے تو سب کی بھلائی کی جائے گی اور اس وژن کو ذہن میں رکھتے ہوئے کانگریس نے کہا ہے کہ حالات بدلیں گے۔ انہوں نے کہا کہ ملکی صنعتوں کو چند لوگوں کے کنٹرول میں نہیں ہونا چاہیے، اس میں مسابقت ہونی چاہیے۔

کانگریس لیڈر نے کہاکہ ’’یہ الیکشن بنیادی طور پر مختلف ہے۔ میں نہیں سمجھتا کہ جمہوریت کبھی اس قدر خطرے میں پڑی ہے جتنی آج ہے۔ مودی نے ای ڈی، سی بی آئی جیسے تمام اداروں پر قبضہ کرکے مالی اجارہ داری قائم کی ہے۔ لیکن اب الیکٹورل بانڈز کی تمام اطلاعات سامنے آ گئی ہیں۔ بھتہ کس سے لیا گیا، ٹھیکہ کس کو دیا گیا، ٹھیکے کے بعد کتنی رقم دی گئی۔ اس کا مکمل بلیو پرنٹ سامنے آگیا ہے، اس لیے مودی خوفزدہ ہیں۔