دہلی میں آندھی-بارش کا الرٹ جاری، گرم لہر سے جلد ملے گی راحت!

قومی راجدھانی دہلی سمیت پورے شمالی ہند میں گزشتہ کئی دنوں سے گرمی کا قہر بڑھتا ہی جا رہا ہے۔ مارچ مہینے سے شروع ہوئی گرمی کی تپش میں دن بہ دن اضافہ ہو رہا ہے۔ حالانکہ آنے والے دنوں میں دہلی کے باشندوں کو بڑی راحت ملنے والی ہے۔ محکمہ موسمیات نے دو دنوں تک بارش کا امکان ظاہر کیا ہے اور 21 اپریل کو آندھی چلنے کے بھی آثار بتائے گئے ہیں۔

محکمہ موسمیات کے مطابق دہلی میں بدھ سے دو دنوں تک بارش ہونے والی ہے۔ حالانکہ درجہ حرارت میں بہت زیادہ گراوٹ دیکھنے کو نہیں ملے گی، لیکن یہ ضرور ہے کہ بارش کی وجہ سے دھوپ کی شدت میں کمی ہوگی۔ دہلی کے اس ہفتے کے آئندہ دنوں کے درجہ حرارت کی بات کریں تو پیر کو کم از کم درجہ حرارت 23 ڈگری سلسیس اور زیادہ سے زیادہ درجہ حرارت 42 ڈگری سلسیس رہے گا۔

بدھ کے بارے میں بتایا جا رہا ہے کہ کم از کم درجہ حرارت 24 ڈگری سلسیس اور زیادہ سے زیادہ 41 ڈگری، جمعرات کو کم از کم درجہ حرارت 23 ڈگری اور زیادہ سے زیادہ 39 ڈگری رہے گا۔ دونوں ہی دن راجدھانی دہلی میں ہلکی بارش کے آثار ہیں۔ اس کا اثر جمعہ کے موسم پر بھی پڑے گا جب کم از کم درجہ حرارت 22 ڈگری اور زیادہ سے زیادہ 39 ڈگری سلسیس ہو سکتا ہے۔ جمعہ کے روز آسمان پر بادل بھی چھائے رہنے کے آثار ہیں۔