کیا وزیر اعظم مودی جھارکھنڈ سے کیے وعدوں کو پورا کریں گے یا پھر یہ ’فرضی گارنٹی‘ تھی: جئے رام رمیش

جھارکھنڈ میں اسمبلی انتخاب کی تاریخ قریب آچکی ہے۔ یہاں پہلے مرحلے میں 13 نومبر کو ووٹنگ ہونے والی ہے۔ ایسے میں سیاسی سرگرمیاں کافی بڑھ گئی ہیں۔ اس سلسلے میں کانگریس کے سینئر رہنما جئے رام رمیش نے پیر کو سوشل میڈیا سائٹ 'ایکس' پر ایک پوسٹ کرکے مرکزی حکومت کو تنقید کا نشانہ بنایا ہے۔ ساتھ ہی انہوں نے وزیر اعظم مودی کو پرانے وعدے یاد دلاتے ہوئے جھارکھنڈ میں ووٹ مانگنے سے قبل ان کے تین سوالوں کا جواب دینے کے لیے کہا۔

پہلے سوال کے طور پر جئے رام رمیش نے کوربا-لوہردگا اور چترا- گیا ریلوے لائن کے بارے میں پوچھا ہے۔ انہوں نے کہا کہ لوہردگا اور چترا کے لوگ تعلیم، روزگار اور کاروبار کے مواقع تک پہنچ میں سدھار کے لیے کافی سال سے بہتر ریل رابطہ کا مطالبہ کر رہے ہیں لیکن مودی حکومت کے اقتدار میں آنے کے 10 برس بعد بھی اور لوہردگا سے لگاتار دو بار بی جے پی ایم پی منتخب ہونے کے باوجود اس سلسلے میں کوئی پیش رفت نہیں ہوئی ہے۔

انہوں نے کہا کہ اکتوبر 2022 میں وزارت ریل نے چترا-گیا ریل پروجیکٹ کو منظوری دی تھی لیکن دو سال بعد بھی کوئی کام نہیں ہوا ہے۔ کوربا-گملا-لوہردگا لائن کے لیے لوگوں کو اور کتنا انتظار کرنا پڑے گا؟ چترا-گیا ریل لائن کے لیے لوگوں کا انتظار کب ختم ہوگا؟ کیا نن بایولوجیکل وزیر اعظم ان ضروری منصوبوں کو پورا کرنے کے لیے کچھ کر رہے ہیں؟

جئے رام رمیش نے اپنے دوسرے سوال میں وزیر اعظم کو 2014 کا وعدہ یاد دلایا جس میں انہوں نے انجینئرنگ کالجوں اور تعلیمی پروجیکٹس بنانے کی بات کہی تھی۔ انہوں نے کہا کہ وزیر اعظم نے جھارکھنڈ میں ایک آئی ٹی ادارہ اور انجینئرنگ کالجوں سمیت کئی صنعتی اور تعلیمی پروجیکٹس کا وعدہ کیا تھا لیکن اب تک صرف دو ادارے ہی قائم ہوئے ہیں۔ این آئی ایل آئی ٹی رانچی اور سی آئی پی ای ٹی کھونٹی۔ ان اداروں کے پاس بھی ابھی تک کوئی مستقل احاطہ نہیں ہے۔ وہیں یو پی اے حکومت نے آئی آئی ایم رانچی اور ایک سنٹرل یونیورسٹی جیسے معیاری سطح کے انسٹی چیوٹ قائم کیے تھے۔ وزیر اعظم تعلیمی اداروں کے وعدے پورے کرنے میں کیوں ناکام رہے جو انہوں نے 10 سال قبل کیے تھے؟

کانگریس کے سینئر رہنما نے کوڈرما میں میڈیکل کالج کے بارے میں بھی مرکزی حکومت سے سوال پوچھا۔ انہوں نے کہا کہ وزیر اعظم مودی نے بار بار کوڈرما میں میڈیکل کالج بنانے کا وعدہ کیا ہے لیکن یہ منصوبہ ابھی تک عمل میں نہیں آیا ہے۔ یہ کالج 70 ایکڑ زمین پر بنایا جانا تھا اور اس میں 100 ایم بی بی ایس کی سیٹیں ہونی تھیں۔ مودی نے 6 سال پہلے اس کا سنگ بنیاد رکھا تھا اور 2019 میں اس منصوبے کو پھر سے پورا کرنے کا وعدہ کیا تھا۔ جئے رام رمیش نے آگے کہا کہ کیا وزیر اعظم کبھی اپنے ان وعدوں کو پورا کرنے کا ارادہ رکھتے ہیں یا یہ بھارتیہ جملہ پارٹی کی ایک اور 'مودی کی فرضی گارنٹی' ہے؟