سکھدیو سنگھ گوگامیڈی کی اہلیہ نے تحریری یقین دہانی کے بعد ختم کیا  احتجاج

کرنی سینا کے صدر سکھ دیو سنگھ گوگامیڈی کے قتل کے خلاف جاری احتجاج ختم کر دیا گیا ہے۔ اہلیہ نے تحریری یقین دہانی کے بعد احتجاج ختم کر دیا ہے کہ قتل کیس میں مطلوب افراد کو 72 گھنٹے میں گرفتار کر لیا جائے گا۔نیوز پورٹل ’اے بی پی ‘ پر شائع خبر کے مطابق  اب ہڑتال ختم ہونے کے بعد میت کو صبح 7 بجے سے جے پور کے راجپوت بھون میں آخری درشن کے لیے رکھا جائے گا۔ سکھ دیو سنگھ کے آخری درشن کا پروگرام تقریباً 2 گھنٹے تک جاری رہے گا۔ پھر اسے بذریعہ سڑک سکھدیو  کے آبائی گاؤں گوگامیڈی لے جایا جائے گا۔ راستے میں مختلف مقامات پر لوگ خراج عقیدت پیش کریں گے۔

تحریری یقین دہانی پر سکھ دیو سنگھ کی اہلیہ شیلا شیخاوت نے مائیک ہاتھ میں لیا اور کہا کہ آپ کی جدوجہد رنگ لائی۔ ہمیں ابھی اعلیٰ حکام نے بتایا ہے کہ شیام نگر پولیس اسٹیشن کے ایس ایچ او اور دیگر پولیس اہلکاروں کو فوری اثر سے معطل کر دیا گیا ہے۔ آخری درشن کل گوگامیڈی میں ہوگا۔ 10 دسمبر کو دہلی کے رام لیلا میدان میں خراج عقیدت پیش کیا جائے گا۔

واضح رہے کہ منگل کو کرنی سینا کے صدر سکھدیو سنگھ گوگامیڈی کو گولی مار کر ہلاک کر دیا گیا تھا۔ لارنس بشنوئی گینگ نے قتل کی ذمہ داری قبول کی ہے۔ پولیس نے ہریانہ سے دو افراد کو گرفتار کیا ہے۔آپ کو بتاتے چلیں کہ پولس کمشنر بیجو جارج کی قیادت میں خاندان کی جانب سے بدھ کو مقامی ایم ایل اے اور تمام سماج کے لیڈروں کی ایک میٹنگ ہوئی جس میں پوسٹ مارٹم کرانے پر اتفاق کیا گیا۔

پنجاب پولیس کے مطابق، فروری میں، پنجاب کے ڈائریکٹر جنرل آف پولیس (ڈی جی پی) کے دفتر نے راجستھان پولیس کو ایک خط لکھا تھا جس میں کہا گیا تھا کہ لارنس بشنوئی گینگ کے بدنام زمانہ گینگسٹر سمپت نہرا نے "راجستھان میں مذہبی طور پر متاثر فسادات بھڑکانے کے لیے گوگامیڈی کو قتل کرنے کا ارادہ کیا تھا۔" راجستھان پولیس نے کہا تھا کہ گوگامیڈی کے قتل میں ایک ملزم ہریانہ اور دوسرا راجستھان سے ہے۔