میری نیند کیوں خراب کی؟ 100 نمبر پر ڈائل کرنے پر کانسٹیبل کا نوجوان پر حملہ

حیدرآباد: جھگڑے کی شکایت کرنے والے ایک نوجوان پر کانسٹیبل نے حملہ کر دیا اور اس کو پولیس اسٹیشن لے گیا تاہم جب یہ پتہ چلا کہ اس نوجوان کا تعلق میڈیا سے ہے تو اس کو رہا کر دیا گیا۔ اتوار کی شب پیش آئے اس واقعہ کے بعد کانسٹیبل کے خلاف نوجوان کے خاندان نے شکایت کی اور سخت کارروائی عمل میں لانے کا مطالبہ کیا۔

کمشنر آف پولیس سائبر آباد وی سی سجنار نے اس کانسٹیبل کے خلاف کارروائی کی یقین دہانی کروائی۔ تفصیلات کے مطابق حیدرآباد کے جیڈی مٹلہ کی ایچ اے ایل کالونی میں اشرار سے جھگڑے پر پیر کی رات دیر گئے دو بجے اس نوجوان نے 100 نمبر کو فون کیا اور اس بات کی شکایت کی جس کے بعد جیڈی مٹلہ پولیس کانسٹیبل کوٹیشور راؤ اس کالونی کو پہنچا اور فون کرنے والے نوجوان کو گھرسے طلب کیا۔ اس نے نوجوان پر برہمی ظاہر کی اور کہا کہ میری نیند کیوں خراب کی؟

کانسٹیبل نے نوجوان کو طمانچہ رسید کردیا اور اس کو اپنے ساتھ پولیس اسٹیشن لے گیا۔ اس نوجوان کو اس کے ارکان خاندان نے کالونی میں تلاش کیا تاہم وہ کالونی میں نہیں ملا۔ مقامی افراد نے ان کو بتایا کہ نوجوان کو پولیس اسٹیشن لے جایا گیا ہے۔ جب اس کانسٹیبل کو پتہ چلا کہ یہ نوجوان میڈیا میں کام کرتا ہے تو اس کو چھوڑ دیا گیا۔

اس واقعہ پر اس نوجوان کے ارکان خاندان نے ڈی جی پی اور کمشنر پولیس سائبر آباد سے اس کانسٹبل کی شکایت کی۔ کمشنر پولیس نے ان کو یقین دہانی کروائی کہ اس کانسٹیبل کے خلاف کارروائی کی جائے گی۔