’دن میں 19 گھنٹے کام کرتا ہوں، نیند بھی پوری نہیں ہو پاتی‘، بامبے ہائی کورٹ کے جسٹس گوتم پٹیل نے ایسا کیوں کہا؟

بامبے ہائی کورٹ کے جسٹس گوتم نے 8 فروری کی شام 4.30 بجے جب 16 معاملوں کی سماعت کے بعد اٹھنے لگے تو ایک وکیل نے ان کے سامنے ایک معاملے پر آئندہ دن ارجنٹ سماعت کی درخواست لے کر پہنچ گئے۔ اس درخواست کو سن کر جسٹس گوتم نے کچھ ایسا کہا جس سے ان کی تکلیف ظاہر ہو گئی۔ انھوں نے کہا کہ ’’دن میں 19-19 گھنٹے کام کرتا ہوں۔ نیند بھی پوری نہیں ہو پاتی ہے۔ اگلی تاریخ کے لیے 70 سے زیادہ معاملوں کو پڑھنا پڑتا ہے، ججمنٹ میں تصحیح جیسے کام الگ ہیں ہی۔‘‘

بار اینڈ بنچ کی ایک رپورٹ میں بتایا گیا ہے کہ جسٹس گوتم پٹیل کی بنچ شام 4.30 بجے جب 16 معاملوں کی سماعت کے بعد اٹھنے کو ہوئی تو ایک ایڈووکیٹ نے اپنے معاملے کا تذکرہ کیا جو اسی دن فہرست بند تھا۔ ایڈووکیٹ نے جسٹس پٹیل سے ایمرجنسی کا حوالہ دیتے ہوئے معاملے پر اگلے دن ہی سماعت کی اپیل کی۔ لیکن جسٹس پٹیل نے سرکولیشن سے صاف انکار کر دیا۔ جسٹس گوتم نے کہا کہ ’’کوئی سوال ہی نہیں بنتا ہے کہ معاملے پر اگلے دن سماعت ہو۔‘‘ انھوں نے مذاقیہ انداز میں یہ بھی کہا کہ ’’میرے حقوق انسانی کی خلاف ورزی کے لیے آپ کے خلاف ایکشن لوں گا۔‘‘ جسٹس گوتم نے باتوں ہی باتوں میں بتایا کہ کس طریقے سے ججوں کو مقررہ مدت سے کہیں زیادہ کام کرنا پڑتا ہے اور انھوں نے اپنی مثال سب کے سامنے رکھ دی۔

واضح رہے کہ گزشتہ دنوں ہی چیف جسٹس آف انڈیا ڈی وائی چندرچوڑ اور سپریم کورٹ کے جسٹس سنجے کشن کول نے بھی اس مسئلہ کو ہائی لائٹ کیا تھا اور بتایا تھا کہ کس طریقے سے عدلیہ پر کام کا دباؤ ہے۔ چیف جسٹس آف انڈیا نے بتایا تھا کہ کس طریقے سے عدالتی گھنٹوں کے بعد کیسز کو پڑھنے اور ریسرچ میں گھنٹوں گھنٹوں کا وقت لگتا ہے۔ علاوہ ازیں جسٹس سنجے کشن کول نے بھی کہا تھا کہ کسی کو عدالت کے چار پانچ گھنٹے کے علاوہ کام نظر نہیں آتا ہے۔ عدالت کے کام کے بعد ہمیں 8-7 گھنٹے پڑھنا پڑتا ہے، ججمنٹ لکھنا پڑتا ہے۔ یہاں تک کہ بریک کا بھی وقت اسی میں چلا جاتا ہے۔