کٹھوعہ-اناؤ ریپ: مودی نے خاموشی توڑی، کہا بیٹیوں کو انصاف ملے گا

طویل خاموشی کے بعد بلآخر وزیر اعظم نریندر مودی نے کٹھوعہ اور اناؤ عصمت دری کے واقعات پر اپنی خاموشی توڑ دی ہے۔ ایک تقریب سے خطاب کرتے ہوئے وزیر اعظم نریندر مودی نے کہا کہ، ’’گزشتہ دو دنوں سے جن واقعات پر بحث ہو رہی ہے وہ ایک ذی شعور معاشرے کا حصہ نہیں ہو سکتے۔ ایک ملک اور سماج کے طور پر ہم سب شرمندہ ہیں۔‘‘

انہوں نے مزید کہا، ’’میں ملک کو یقین دلانا چاہتا ہوں کہ قصورواروں کو بخشا نہیں جائے گا اور پورا انصاف ہوگا۔ ہماری بیٹیوں کو انصاف ضرور ملے گا۔‘‘

واضح رہے کہ ویزر اعظم نریندر مودی کی مسلسل چل رہی خاموشی کے بیچ ویب سائٹ ’دی کوئنٹ‘ نے ایک خبر شائع کی تھی جس میں سرخی لگائی گئی ’’کٹھوعہ اور اناؤ کے واقعات پیر نریندر مودی کا بیان‘‘۔ خبر کے اندر یہ لکھا گیا کہ وہ اس خبر کو اس وقت اپ ڈیٹ کریں گے جب وزیر اعظم کٹھوعہ اور اناؤ کے واقعات پر در حقیقت کوئی بیان جاری کریں گے۔ اب انہوں نے بیان جاری کر دیا ہے، تاہم بیٹیوں کا انصاف کب ہوگا یہ کسی کو معلوم نہیں۔