مغربی یوپی کا ’چھوٹا شکیل‘ گینگسٹر انیل دوجانہ ہلاک، یوپی ایس ٹی ایف نے میرٹھ میں کیا ڈھیر

میرٹھ: بدنام زمانہ گینگسٹر انیل دوجانہ عرف انیل ناگر کو ایس ٹی ایف نے ایک انکاؤنٹر میں ہلاک کر دیا ہے۔ یوپی ایس ٹی ایف نے میرٹھ میں یہ کارروائی انجام دی۔ دوجانہ 10 اپریل کو ضمانت پر باہر آیا تھا۔ جیل سے رہا ہوتے ہی اس نے گوتم بدھ نگر میں اپنے خلاف گواہی دینے والے لوگوں کو دھمکی دی تھی۔

ایس ٹی ایف کو اطلاع ملی تھی کہ وہ کسی بڑی واردات کو انجام دینے کی تیاری میں ہے۔ جس کی وجہ سے اس کی تلاش شروع ہو گئی۔ اسی سلسلے میں اس کے میرٹھ میں روپوش ہونے کی اطلاع ملی۔ انیل دوجانہ کا خوف اس قدر تھا کہ جرائم کی دنیا خاص کر مغربی یوپی میں اسے ’چھوٹا شکیل‘ کے لقب سے نوازا جاتا تھا۔ کہا جاتا ہے کہ جس نے اس کے خلاف آواز اٹھائی، دوجارنہ نے اسے قتل کر دیا۔ کوئی اس کے خلاف بولنے سے بھی ڈرتا تھا۔

دجانہ پر قومی راجدھانی دہلی اور اتر پردیش میں 60 سے زیادہ فوجداری مقدمات درج ہیں۔ جن میں نوئیڈا، غازی آباد، مظفر نگر سمیت اتر پردیش کے کئی اضلاع میں قتل، ڈکیتی، لوٹ مار اور بھتہ خوری جیسے سنگین معاملات میں ایف آئی آر درج کی گئی ہے۔

دہلی اور یوپی کی پولیس مسلسل دوجانہ کو تلاش کر رہی تھی۔ گزشتہ سال دہلی پولیس نے دوجانہ اور اس کے دو ساتھیوں کو بھی گرفتار کیا تھا۔ دوجانہ گوتم بدھ نگر کا رہنے والا تھا۔ اس کے گینگ نے 2011 میں صاحب آباد میں ایک شادی کی تقریب میں فائرنگ کی تھی، جس میں تین افراد مارے گئے تھے۔

دوجانہ کی بدنام زمانہ مافیا سندر بھاٹی اور اس کے گینگ سے دشمنی رہی ہے۔ اس دشمنی میں کئی قتل ہو چکے ہیں۔ 2012 میں دجانہ اور اس کے گینگ نے سندر بھاٹی اور اس کے قریبی ساتھیوں پر اے کے-47 رائفل سے حملہ کیا تھا۔ یہ دونوں گینگ اکثر سرکاری ٹھیکوں، سریئے کی چوری اور ٹول ٹھیکوں کے حوالے سے آمنے سامنے آ جاتے تھے۔ یہی وجہ تھی کہ جب پولیس دوجانہ کو عدالت لے جاتی تھی تو اسے بلٹ پروف جیکٹ دی جاتی تھی۔

انیل دوجانہ گینگسٹر نریش بھاٹی کا قریبی اور شوٹر تھا۔ نریش کا قتل سندر بھاٹی نے کیا تھا۔ اس کے بعد انیل نے بدلہ لینے کے لیے سندر پر حملہ کیا۔ یہیں سے دونوں کے درمیان دشمنی کا ایسا سلسلہ شروع ہوا جس میں کئی بار گولیاں چلیں۔ اس وقت انیل دوجانہ نریش بھاٹی گینگ کی کمان سنبھال رہا تھا۔