مغربی بنگال: ترنمول کانگریس لیڈر سیف الدین لسکر کا دن دہاڑے گولی مار کر قتل

مغربی بنگال سے ایک خوفناک واقعہ کی خبر سامنے آ رہی ہے۔ ریاست کے جنوبی 24 پرگنہ میں 13 نومبر کو ترنمول کانگریس لیڈر سیف الدین لسکر کا دن دہاڑے گولی مار کر قتل کر دیا گیا ہے۔ پولیس افسر نے خبر رساں ایجنسی اے این آئی سے بات کرتے ہوئے کہا کہ ’’قتل واقعہ میں ایک شخص کو گرفتار کیا گیا ہے اور اس نے اپنا جرم بھی قبول کر لیا ہے۔‘‘

دراصل جوائے نگر علاقے میں بامونگاچی کے ترنمول کانگریس علاقائی صدر سیف الدین لسکر کا ان کے گھر کے پاس ہی کچھ بدمعاشوں نے گولی مار کر قتل کر دیا۔ مقامی لوگوں کا کہنا ہے کہ سیف الدین کے حامیوں نے مبینہ طور پر حملہ آوروں میں سے ایک کو پکڑ لیا اور پیٹ پیٹ کر اس کا قتل کر دیا۔ ترنمول کانگریس کے مقامی لیڈروں کا الزام ہے کہ سیف الدین کے قتل کے پیچھے سی پی ایم حامیوں کا ہاتھ ہے۔

اس درمیان مقامی مارکسوادی کمیونسٹ پارٹی حامیوں نے دعویٰ کیا ہے کہ سیف الدین کی موت کے بعد اس کے حامیوں نے سی پی ایم حامیوں کے گھروں میں توڑ پھوڑ کی اور کچھ گھروں میں آگ لگا دی۔ سی پی ایم کی مرکزی کمیٹی کے رکن سجان چکرورتی نے کہا کہ ہر موت افسوسناک ہے اور قاتلوں کو پکڑنے کے ساتھ ہی سازش کا پردہ فاش کرنے کے لیے پولیس کو مناسب جانچ کرنی چاہیے۔ ساتھ ہی انھوں نے ان الزامات کو خارج کر دیا کہ سیف الدین کا سی پی ایم اراکین نے قتل کیا۔ سجان نے کہا کہ ’’سیف الدین لسکر کا قتل ترنمول کانگریس کی داخلی رنجش کا نتیجہ ہے، ہماری پارٹی کو قصوروار ٹھہرانے کا کوئی مطلب نہیں۔‘‘